দিল্লীত যমুনা নৈৰ পাৰত পঞ্চভুতত বিলীন হ'ল অসমৰ অজিত শইকীয়া
দিল্লীতে শেষকৃত্য সম্পন্ন কৰা হ'ল দুৰ্ভগীয়া অজিত শইকীয়াৰ ৷ উল্লেখ্য যে গোলাঘাটৰ নিবাসী তথা অসম চৰকাৰৰ অৱসৰপ্ৰাপ্ত কৰ্মচাৰী শইকীয়া কৰ্কট ৰোগত আক্ৰান্ত আছিল। কৰ্কটৰ চিকিৎসা কৰাবলৈ তেওঁ দিল্লীলৈ গৈছিল । তাত চিকিৎসাধীন অৱস্থাতে তেওঁৰ শৰীৰত মাৰাত্মক ক'ৰ'না ভাইৰাছৰ উপস্থিতি ধৰা পৰে৷ তেতিয়া তেওঁক দিল্লীৰ লোকনায়ক জয়প্ৰকাশ নাৰায়ন হাস্পতালত ভৰ্তি কৰা হয়৷ তাতে যোৱা সাত মে'ত চিকিৎসাধীন অৱস্থাতে তেওঁৰ মৃত্যু হয় ।মৃত্যুৰ সময়ত শইকীয়া বয়স হৈছিল ৬৪বছৰ ৷ আশ্বৰ্যজনক যে চিকিৎসালয় কৰ্তৃপক্ষই শইকীয়াৰ মৃত্যুৰ খবৰ যোৱা ১৭মে'তহে পৰিয়ালৰ লোকক দিয়ে ৷ ইয়াকে লৈ তীব্ৰ প্ৰতিক্ৰিয়াৰ সৃষ্টি হয় ৷ এই প্ৰতিক্ৰিয়া অব্যাহত থকাৰ সময়তে আজি দিনৰ ১১বজাত দিল্লীৰ যমুনা নৈৰ পাৰৰ নিগামবুধ ঘাটত শইকীয়াৰ শেষকৃত্য সম্পন্ন কৰা হয় ৷ চাপকৃত প্ৰাকৃতিক গেছ বা CNGৰে তেওঁৰ অন্তেষ্টিক্ৰিয়া সম্পন্ন কৰা হয়৷ ক'ৱিড-১৯ত মৃতৰ শেষকৃত্য সম্পন্ন কৰোতে পালন কৰা সকলো বিধি শইকীয়াৰ ক্ষেত্ৰটো মানি চলা হয় ৷ ইয়াৰ পূৰ্বে আজি পুৱা তেওঁৰ মৃত্যুৰ প্ৰমাণপত্ৰ পৰিয়ালৰ লোকে সংগ্ৰহ কৰে ৷ চিকিৎসালয়ৰ সমগ্ৰ আনুষ্ঠানিকতা পুৱা ৯-৩০বজাৰ ভিতৰত সম্পন্ন কৰা হয় ৷ পাছত নশ্বৰ দেহ নীতি-নিয়মৰ মাজেৰে নিগামবুধ ঘাটলৈ নিয়া হয় ৷