তলাবন্ধই ক'ৰ'না মহামাৰীজনিত পৰিস্থিতি উন্নত কৰিব নোৱাৰিলেঃ মোদী চৰকাৰক তীব্ৰ সমালোচনা ৰাহুলৰ
বিশ্বজুৰি ত্ৰাসৰ সৃষ্টি কৰা ক'ৰ'না মহামাৰী ৰোধৰ উদ্দেশ্যে দেশত ঘোষণা কৰা তলাবন্ধ অথবা ল'ক-ডাউনে পৰিস্থিতি মুঠেই উন্নত কৰিব নোৱাৰিলে নৰেন্দ্ৰ মোদী চৰকাৰক তীব্ৰ ভাষাৰে সমালোচনা কৰিছে কংগ্ৰেছ নেতা ৰাহুল গান্ধীয়ে ৷ এই দীঘলীয়া লক-ডাউনে ইস্পিত লক্ষ্য পূৰণ কৰিব নোৱাৰিলে বুলি মন্তব্য কৰি ৰাহুলে আগন্তক দিনৰ বাবে মোদী চৰকাৰে ক'ৰ'না মহামাৰী নিয়ন্ত্ৰণৰ বাবে কি কাৰ্যসূচী গ্ৰহণ কৰিছে বুলিও প্ৰশ্ন কৰে ৷ ভিডিঅ' কনফাৰেন্সিঙৰ জৰিয়তে এখন সংবাদমেল সম্বোধন কৰি কংগ্ৰেছৰ প্ৰাক্তন সভাপতিজনে কয় যে লক-ডাউন আৰোপৰ জৰিয়তে দেশৰ প্ৰধানমন্ত্ৰীয়ে যি আহৰণৰ লক্ষ্য লৈছিল, সেই লক্ষ্যত উপনীত হোৱাত ব্যৰ্থ হ'ল ৷ " এয়া স্পষ্ট হৈছে যে চাৰিটা পৰ্যায়ৰ ল'ক-ডাউনৰ জৰিয়তে প্ৰধানমন্ত্ৰীয়ে যি লক্ষ্যত উপনীত হোৱাৰ আঁচনি লৈছিল, সেই আঁচনি ব্যৰ্থ হ'ল ৷ প্ৰধানমন্ত্ৰী আৰু তেওঁৰ উপদেষ্টা মণ্ডলী( বিশেষজ্ঞ চিকিৎসককে ধৰি)য়ে মে'ৰ অন্তিমৰ পৰা দেশত ক'ৰ'না আক্ৰান্তৰ সংখ্যা হ্ৰাস পাব বুলি কৈছিল ৷ কিন্তু দুখৰ বিষয় যে দেশত ক'ৰ'না আক্ৰান্তৰ সংখ্যা বৃদ্ধি পাই আছে," ৰাহুলে এইদৰে কয় ৷ প্ৰধানমন্ত্ৰী মোদীক প্ৰত্যক্ষভাৱে আক্ৰমণ কৰি ৰাহুলে আৰু কয়, " আমাক কোৱা হৈছিল যে ২১দিনত ক'ৰ'নাবিৰোধী যুঁজখনৰ অন্ত পৰিব ৷ কিন্তু ৬০দিন পাৰ হ'ল ৷ ৰোগ আগবাঢ়ি আছে ৷ মই চিকিৎসালয় কৰ্তৃপক্ষৰ সৈতে কথাপাতি জানিব পাৰিছো যে আক্ৰান্তৰ সংখ্যা বৃদ্ধি পাই আছে৷"
কংগ্ৰেছৰ প্ৰাক্তন সভাপতিজনে এইবুলিও অভিযোগ কৰে যে কংগ্ৰেছশাসিত ৰাজ্যসমূহে কোনো সহায় অবিহনে অকলে ক'ৰ'না মহামাৰীৰ বিৰুদ্ধে যুঁজ দিবলগীয়া হৈছে ৷ প্ৰধানমন্ত্ৰী মোদীয়ে ঘোষণা কৰা ২০লাখ কোটিটকীয়া পেকেজক লৈও ৰাহুলে কেন্দ্ৰীয় চৰকাৰক সমালোচনা কৰে ৷ তেওঁ অভিযোগ কৰে যে যদিও মোদীয়ে জি ডি পিৰ ১০শতাংশৰ জৰিয়তে ২০লাখ কোটি টকাৰ পেকেজ আগবঢ়োৱাৰ কথা ঘোষণা কৰিছে ৷ দৰাচলতে এই পেকেজৰ পৰিমাণ জি ডি পিৰ এক শতাংশহে বুলি ৰাহুলে মন্তব্য কৰে ৷
উল্লেখ্য যে সম্প্ৰতি দেশত ক'ৰ'না আক্ৰান্তৰ সংখ্যা এক লাখ ৪৫হেজাৰলৈ বৃদ্ধি পাইছে ৷