মণিপুৰৰ ক্ষমতাৰ ৰাজনীতিত নাটকীয় পট পৰিৱৰ্তন ঘটিছে ৷ ক'ৰ'না মহামাৰীৰ প্ৰাদুৰ্ভাবৰ মাজতে এটা সহযোগী দলৰ মিত্ৰজোঁট চৰকাৰলৈ সমৰ্থন প্ৰত্যাহাৰ তথা একাংশ বিধায়কৰ পদত্যাগে চৰকাৰখনক অস্থিৰ কৰি ৰখাৰ সময়তে আজি বিৰোধী কংগ্ৰেছে চৰকাৰ গঠনৰ দাবীৰে ৰাজ্যপালক সাক্ষাৎ কৰে ৷ তিনিটা কাৰ্যকালৰ মুখ্যমন্ত্ৰী তথা জ্যেষ্ঠ কংগ্ৰেছ নেতা ইক্ৰাম ইব'বী সিঙৰ নেতৃত্বত সহযোগী দলৰ নেতৃত্বৰ সৈতে বিৰোধী দলটোৰ এটা প্ৰতিনিধি দলে আজি বিয়লি পাঁচ বজাত ৰাজ্যপাল নাজমা হেপতুল্লাক সাক্ষাৎ কৰে ৷ তদুপৰি এন বীৰেন সিং চৰকাৰলৈ অলপতে সমৰ্থন প্ৰত্যাহাৰ কৰা এন এন পিৰ দলৰ নেতাও ৰাজ্যপালক সাক্ষাৎ কৰাৰ সময়ত উপস্থিত থাকে ৷
আনহাতে, এই সম্পৰ্কত মণিপুৰ কংগ্ৰেছৰ মুখপাত্ৰ এন ভূপেন্দ্ৰ মেইটেই সাংবাদিকৰ আগত কয়, " চৰকাৰৰ শক্তি পৰীক্ষাৰ বাবে বিধানসভাৰ এক বিশেষ অধিৱেশন অনুষ্ঠিত হ'ব বুলি মই আশা কৰো ৷ আমাৰ ২৪জন কংগ্ৰেছ বিধায়ক থকাৰ বিপৰীতে বিজেপিৰ কেৱল ১৮জন বিধায়কহে আছে ।আমি জয়ী হ'ম বুলি নিশ্চিত আছো৷"
আৰু পঢ়িব পাৰেঃ বাঘজানৰ অগ্নিকাণ্ডস্থলীত লেফটেনেণ্ট জেনেৰেল ৰাণা প্ৰতাপ কলিতা