আৰক্ষী বিষয়া ভাস্কৰ কলিতা হত্যাত অভিযুক্ত কৰি আলফা (স্বাধীন)ৰ শীৰ্ষ নেতা বিজিত গগৈ ওৰফে অৰুণোদয় দহোটীয়া ওৰফে অৰুণোদয় অসমসহ সাতজনৰ বিৰুদ্ধে এন আই এ-ই অভিযোগনামা দাখিল কৰিছে ৷ কেন্দ্ৰীয় তদন্তকাৰী সংস্থাটোৱে দাখিল কৰা এই অভিযোগনামাত দহোটীয়াৰ উপৰি কান্ত বৰা ওৰফে ৰূপন অসম, সন্তোষ গগৈ, জুচিন্তা মৰাণ ওৰফে য়াংখো অসম, বাবুল মৰাণ ওৰফে টাইগাৰ অসম , দীপাংকৰ বৰা ওৰফে ঘুটুক আৰু মামুন দিহিঙীয়াৰ নাম আছে।
এন আই এই অভিযোগনামাত উল্লেখ কৰিছে আলফা (স্বাধীন)-ৰ শীৰ্ষ নেতা দহোটীয়াৰ নেতৃত্বত সংগঠনটোৰ এটা দলে আৰক্ষী উপ-পৰিদৰ্শক কলিতাক হত্যা কৰে ৷ উল্লেখ্য যে ২০১৮-ৰ চাৰি মে'ত কাকপথাৰত আলফা(স্বাধীন)-ৰ আক্ৰমণত আৰক্ষী বিষয়াজনে প্ৰাণ হেৰুৱায়। তেওঁক আক্ৰমণ কৰা দলটোত আছিল কান্ত বৰা ওৰফে ৰূপন অসম, সন্তোষ গগৈ, জুচিন্তা মৰাণ ওৰফে য়াংখো অসম, বাবুল মৰাণ ওৰফে টাইগাৰ অসম , দীপাংকৰ বৰা ওৰফে ঘুটুক আৰু ৰুদ্বেশ্বৰ বৰুৱা আৰু মামুন দিহিঙীয়া । ইয়াৰে ৰুদ্বেশ্বৰ বৰুৱাৰ ইতিমধ্যে মৃত্যু হৈছে।
যিটো দলে আৰক্ষী বিষয়াজনক আক্ৰমণ কৰিছিল সেই দলটোৰ হাতত অত্যাধুনিক এচাল্ট ৰাইফল, আই ই ডি, বিস্ফোৰকৰ গুৰি আদি আছিল ৷ দলটো ধন সংগ্ৰহ আৰু কূটাঘাতমূলক কাৰ্যকলাপৰ সৈতে জড়িত আছিল।
আৰু পঢ়িব পাৰেঃ ৰাজ্যৰ ক'ৰ'নাজনিত পৰিস্থিতিক লৈ গভীৰ আশংকা স্বাস্থ্য মন্ত্ৰীৰ