বিশিষ্ট সাহিত্যিক, সমালোচক তথা সাংবাদিক প্ৰয়াত মুনীন বৰকটকীৰ পুণ্যস্মৃতিত মুনীন বৰকটকী স্মাৰক ন্যাসৰ তৰফৰ পৰা অসমীয়া ভাষাৰ তৰুণ লেখক-লেখিকাসকললৈ প্ৰতি বছৰে প্ৰদান কৰি অহা মুনীন বৰকটকী সাহিত্য বঁটা ২০১৮ ঘোষণা কৰা হৈছে।
এইবাৰ এই বঁটা লাভ কৰিছে অসমীয়া ভাষাৰ প্ৰতিশ্ৰুতিসম্পন্ন তৰুণ সমালোচক ডঃ দেৱভূষণ বৰাই । তেওঁৰ নিৰ্বচন (বান্ধৱ, ২০১৭) শীৰ্ষক সাহিত্য সমালোচনাৰ সংকলনটোৰ বাবে এই বঁটা আগবঢ়োৱা হৈছে ।
১৯৯৫ চনৰ পৰা প্ৰদান কৰি অহা এই বঁটাত আছে নগদ পঞ্চাছ হাজাৰ টকা, এটা স্মাৰক আৰু এখন প্ৰশস্তি-পত্ৰ। গুৱাহাটীত অহা বছৰৰ ফেব্ৰুৱাৰী মাহত মুনীন বৰকটকী সাহিত্য বঁটা আনুষ্ঠানিকভাৱে প্ৰদান কৰা হব ।
গুৱাহাটী বিশ্ববিদ্যালয়ৰ ইংৰাজী সাহিত্যৰ স্নাতকোত্তৰ ডিগ্ৰীধাৰী বৰাই ছাত্ৰ অৱস্থাতে 'প্ৰান্তিক' ৰ পাতত প্ৰবন্ধকাৰ হিচাপে আত্মপ্ৰকাশ কৰি পাছলৈ সাহিত্য-সমালোচনাত বিশেষভাৱে মনোনিবেশ কৰে ।
প্ৰকাশ, সাতসৰী, গৰীয়সী, আলাপ আদি প্ৰায় সকলো আগশাৰীৰ অসমীয়া আলোচনীৰ লেখক বৰা সম্প্ৰতি মাজুলী মহাবিদ্যালয়ৰ ইংৰাজী বিভাগৰ অধ্যাপক হিচাপে কৰ্মৰত ।