ভাৰতীয় নিৰ্বাচনী আয়োগে (Election Commission of India) বৃহস্পতিবাৰে সংসদীয় নিৰ্বাচনৰ তৃতীয় পৰ্যায়ৰ নিৰ্বাচনৰ কাৰণে অধিসূচনা জাৰি কৰাৰ লগতে অসমত মনোনয়ন পত্ৰ দাখিল কৰাৰ প্ৰক্ৰিয়া আৰম্ভ কৰে ৷ তৃতীয় পৰ্যায়ৰ নিৰ্বাচনত চাৰিখন লোকসভা আসন ক্ৰমে গুৱাহাটী,বৰপেটা,ধুবুৰী আৰু কোকৰাঝাৰৰ কাৰণে ভোটগ্ৰহণ অনুষ্ঠিত হ’ব।
ভাৰতীয় নিৰ্বাচন আয়োগৰ অধিসূচনা অনুসৰি মনোনয়ন দাখিল কৰাৰ অন্তিম দিন ৪ এপ্ৰিল ৷ মনোনয়নৰ যাৱতীয় নথি পত্ৰৰ পৰীক্ষা কৰা হ’ব ৫ এপ্ৰিলত ৷ মনোনয়ন প্ৰত্যাহাৰ কৰাৰ অন্তিম দিন ৮ এপ্ৰিল। ইয়াৰ বিপৰীতে ভোটগ্ৰহণ অনুষ্ঠিত হ’ব ২৩ এপ্ৰিলত ৷ অন্যহাতে ভোটগণনা হ’ব ২৩ মে’ত৷ বৃহস্পতিবাৰে অ’ল ইণ্ডিয়া ইউনাইটেড ডেম’ক্ৰেটিক ফ্ৰন্টৰ মুখ্য তথা সাংসদ বদৰুদ্দিন আজমলে ধুবুৰীৰ লোকসভা আসনৰ কাৰণে মনোনয়ন পত্ৰ দাখিল কৰে ৷
ইফালে,বিজেপিয়ে গুৱাহাটী নগৰ নিগমৰ প্ৰাক্তন মেয়ৰ কুইন ওঝাৰ নাম গুৱাহাটী লোকসভা আসনৰ কাৰণে ঘোষণা হয়। ইফালে বড়োলেণ্ড পিপুল্স ফন্টে কোকৰাঝাৰৰ কাৰণে মন্ত্ৰী প্ৰমিলা ৰাণী ব্ৰহ্মৰ নাম ঘোষণা কৰে ৷ অন্যহাতে, অসম গণ পৰিষদৰ বৰপেটা আৰু ধুবুৰীৰ আসনৰ কাৰণে দলৰ প্ৰাৰ্থীৰ নাম ঘোষণা কৰা নাই। উল্লেখ্য যে কংগ্ৰেছ দলেও তৃতীয় পৰ্যায়ৰ নিৰ্বাচনৰ কাৰণে প্ৰাৰ্থীৰ নামৰ সন্দৰ্ভত কোনো সিদ্ধান্ত লোৱা নাই ।
অধিক খবৰৰ বাবে পঢ়ক : শীৰ্ষ বাতৰি