চাহ জনগোষ্ঠীয় ছাত্ৰ সংগঠন আটছাৰ বন্ধত স্তব্ধ হ'ল সমগ্ৰ তিনিচুকীয়া জিলা ৷ যোৱা সোমবাৰে জিলাখনৰ বেতজান চাহ বাগিচাৰ চকীদাৰ ৰাজু ওৰফে বেকী বাইগৰক দুৰ্বৃত্তই হত্যা কৰে ৷ পিছদিনা তেওঁৰ ক্ষত-বিক্ষত মৃতদেহ আৰক্ষীয়ে বাগিচাখনৰ ১৮ নম্বৰ ছেক্টৰৰ পৰা উদ্ধাৰ কৰে ৷ ইয়াৰ পাচৰ পৰা জিলাখনৰ বাগিচা অঞ্চলসমূহত চেঁপা উত্তেজনা বিৰাজ কৰি আছে ৷ চকীদাৰজনৰ হত্যাকাৰীক গ্ৰেপ্তাৰ তথা দোষীৰ দৃষ্টান্তমূলক শাস্তি বিহাৰ দাবীত আজি আটছাই ১২ঘণ্টীয়া জিলা বন্ধৰ আহ্বান জনায় ৷ এই বন্ধৰ প্ৰতি চাহ জনগোষ্ঠীয় আন একাংশ সংগঠনেও সমৰ্থন আগবঢ়ায়। আজি পুৱাৰ পৰা আৰম্ভ হোৱা এই বন্ধত জিলাখনৰ সকলো চাহ বাগিচাৰ কাম-কাজ অচল হৈ পৰে ৷ আনহাতে, ৰাজুৰ মৃতদেহ উদ্ধাৰ হোৱাৰ পাছত বাগিচাৰ ক্ষুব্ধ শ্ৰমিকসকলে মাকুমত ৰাষ্ট্ৰীয় ঘাইপথ উদ্ধাৰ কৰি পৰিস্থিতি উত্তাল কৰে ৷ পাছত আৰক্ষীয়ে পৰিস্থিতি নিয়ন্ত্ৰণ কৰে ৷