বৰ্তমান যুব প্ৰজন্ময়ে আনন্দ উল্লাসৰ মাজত নিজৰ জীৱনকো বিপদাপন্ন কৰি তুলিছে। জীৱনটো কিমান গুৰুত্বপূৰ্ণ সেয়া যেন পাহৰি পেলাইছে বৰ্তমানৰ যুৱ প্ৰজন্ময়ে । যিকোনো উৎসৱে যেন সুৰা অবিহনে উৎযাপন কৰিব নোৱাৰি তেনে এক মানসিকতা গঢ় লৈ উঠিছে যুৱ প্ৰজন্মৰ মাজত । প্ৰত্যেক উৎসৱতে সুৰাসক্ত হৈ সংঘটিত কৰা অপৰাধ বৃদ্ধি পাইছে । উল্লেখযোগ্য যে সুৰাপান কৰি বাহন চলোৱা ঘটনাই নিজৰ লগতে আনৰো জীৱন বিপদাপন্ন কৰি তুলিছে ।
বৃহস্পতি বাৰে দিছপুৰত সুৰাসক্ত হৈ বাহন চলোৱাৰ অপৰাধত ২৮ টা গোচৰ ৰুজু কৰা হৈছে, লগতে ১৮ খন অনুজ্ঞাপত্ৰও জব্দ কৰিছে আৰক্ষীয়ে । শুকুৰবাৰলৈকে ১৯ টা গোচৰ ৰুজু কৰাৰ লগতে ১২ খন অনুজ্ঞাপত্ৰ বাতিল কৰিছে । দিছপুৰ আৰক্ষী থানাৰ এজন আৰক্ষীয়ে প্ৰকাশ কৰা মতে সজাগতা সৃষ্টি কৰাৰ লগতে পথ দুৰ্ঘটনা ৰোধ কৰিবলৈ চলোৱা অভিযানতে এই ভয়াবহ তথ্য পোহৰলৈ আহিছে । লগতে প্ৰকাশ কৰে যে বৰ্তমান সময়ত যুৱ প্ৰজন্ম যথেষ্ট দায়িত্বহীন হৈ পৰাৰ লগতে সুৰাপান কৰি বাহন চলোৱাতো কিমান বিপদজনক হব পাৰে সেয়া অনুধাৱন কৰিব নোৱাৰে । ৰঙৰ উৎসৱৰ দিনাটোত জু- ৰোদ , ফাঁচী বজাৰ , খানাপাৰা আৰু মহানগৰৰ বহু স্থানত তালাচী অভিযান চলাইছিল আৰক্ষীয়ে প্ৰকাশ কৰে ।
তথ্যৰ ভিত্তিত সমগ্ৰ ৰাজ্যৰ ভিতৰত পথ দুৰ্ঘটনা ঘটনা কামৰূপতে বেছি ৰুজু হৈছে । কামৰূপত ১৭ টা গোচৰ ৰুজু হোৱাৰ বিপৰিতে ১৪ টা কামৰূপ মেট্ৰত ৰুজু কৰা হৈছে । আনহাতে ১২ টা যোৰহাটত , ৯ টা নগাঁওত, ৫ টা বঙাইগাওঁ, ডিব্ৰুগড়, শোণিতপুৰ আৰু তিনিচুকীয়াত ৰুজু কৰা হৈছে । ধেমাজি, গোৱালপাৰা আৰু ওদালগুৰিত ৪ টাকৈ গোচৰ ৰুজু কৰা হৈছে । আনহাতে ৩ টা দেৰগাঁওত, ২ টা বৰপেটা, চিৰাং, হাইলাকান্দি, কোকৰাঝাৰ, নলবাৰী, আৰু শিৱসাগৰত ৰুজু হোৱাৰ বিপৰিতে ১ টা বাক্সা, গোলাঘাট, কাৰ্বি আংলং , লক্ষিমপুৰ আৰু মৰিগাঁওত ৰুজু হৈছে । সমগ্ৰ ৰাজ্যতে ১০৪ টা পথ দুৰ্ঘটনাত গোচৰ ৰুজু কৰা হৈছে আৰু লোকসকলক ১০৮ সেৱা আগবঢ়োৱা হৈছে বুলি প্ৰকাশ কৰে ।
অধিক খবৰৰ বাবে পঢ়ক :ৰাজ্যিক বাতৰি