কংগ্ৰেছৰ সভাপতি ৰাহুল গান্ধীৰ পদত্যাগৰ প্ৰস্তাৱ অগ্ৰাহ্য কৰে চি ডব্লিউ চি অৰ্থাৎ দলটোৰ কাৰ্যনিৰ্বাহক কমিটীয়ে ৷ ইফালে চি ডব্লিউ চিয়ে ৰাহুল গান্ধীক দলটোৰ ক্ষেত্ৰত আমূল পৰিৱৰ্তন সাধন কৰি আৰু সাংগঠনিক ভাৱে পুনৰ গঠন কৰিবলৈ আহ্বান কৰে । ইফালে কংগ্ৰেছৰ এক বিশেষ সূত্ৰৰ মতে কংগ্ৰেছৰ অধ্যক্ষ ৰাহুল গান্ধী নিজৰ সিদ্ধান্তত অটল হৈ আছে ,যদিও শনিবাৰে কংগ্ৰেছ ৱৰ্কিং কমিটীয়ে ৰাহুল গান্ধীৰ এই সিদ্ধান্ত সৰ্বসন্মতি ক্ৰমে অগ্ৰাহ্য কৰে ৷
কমিটীয়ে ৰাহুল গান্ধীক সম্প্ৰতি দলটোৰ নেতৃত্ব বহন কৰি বিকাশৰ পথত আগবঢ়াই লৈ যাবলৈ আহ্বান কৰে ৷ লগতে দেশৰ যুৱ প্ৰজন্ম,কৃষক,এচ চি,এচ টি,অ’বিচি,সংখ্যালঘূ সকলোৰে নেতৃত্ব বহন কৰিবলৈ কমিটী আহ্বান কৰে ৰাহুল গান্ধীক ৷ দলটোক সম্পূৰ্ণ বিকাশৰ পথত আগৱঢ়াই লৈ যাবলৈ ৰাহুল গান্ধীক আহ্বান কৰাৰ উপৰিও এখন আঁচনি মুকলি কৰাৰ কথা উল্লেখ কৰে কংগ্ৰেছ ৱৰ্কিং কমিটীয়ে ৷
অন্যহাতে ১২.১৩ কোটি ভোটাৰক কৃতজ্ঞতা জ্ঞাপন কৰে কমিটীয়ে আৰু দলৰ সাহস,একাগ্ৰতা আৰু কৰ্মৰ প্ৰতি নিষ্ঠা, পূৰ্বৰ দৰেই অটুত আছে বুলি উল্লেখ কৰে কমিটীয়ে ৷উল্লেখ্য যে গান্ধীয়ে সভাপতিত্ব কৰা এই বৈঠকত ইউ পি এৰ অধ্যক্ষা ছোনিয়া গান্ধী,প্ৰাক্তন প্ৰধানমন্ত্ৰী মনমোহন সিং,কংগ্ৰেছ শাসিত ৰাজ্যসমূহৰ মুখ্যমন্ত্ৰীসকলকে ধৰি দলৰ জেষ্ঠ্য নেতাসকল উপস্থিত আছিল ৷
অধিক খবৰৰ বাবে পঢ়ক : শীৰ্ষ বাতৰি