কঠিয়াতলী উন্নয়ন খণ্ডৰ লংজাপ গাঁও পঞ্চায়তৰ দুৰ্নীতিৰ বিৰুদ্ধে প্ৰতিবাদ

নগাঁও জিলাৰ কঠিয়াতলী উন্নয়ন খণ্ডৰ অন্তৰ্গত লংজাপ গাঁও পঞ্চায়তত ব্যাপক দুৰ্নীতি সংঘটিত হোৱাৰ অভিযোগ উত্থাপিত হৈছে । কঠিয়াতলী উন্নয়ন খণ্ডৰ একাংশ বিষয়া, ঠিকাদাৰ, দালাল আৰু পঞ্চায়ত প্ৰতিনিধিয়ে মিলি পঞ্চায়তৰ বিভিন্ন আঁচনি ৰূপায়ণৰ নামত প্ৰায় ডেৰ কোটি টকা আত্মসাৎ কৰাৰ অভিযোগ উঠিছে । পঞ্চায়তটোত অনুমোদন হোৱা কোনো আঁচনি বৰ্তমানে কাৰ্যকৰী হোৱা নাই । যাৰ ফলত উন্নয়নৰ মুখ দেখা নাই পঞ্চায়তটোৰ বাসিন্দাই ।

লংজাপ পঞ্চায়তত চলি থকা দুৰ্নীতিৰ বিৰুদ্ধে বুধবাৰে কৃষক মুক্তি সংগ্ৰাম সমিতিয়ে পঞ্চায়তটোত এখন প্ৰতিবাদী সভা অনুষ্ঠিত কৰি দুৰ্নীতিত জড়িত সকলোকে সতৰ্ক কৰি দিয়ে । পিছত কৃষক মুক্তি সংগ্ৰাম সমিতিৰ নেতৃত্বত ভুক্তভোগী ৰাইজে পঞ্চায়ত কাৰ্যালয় ঘেৰাও কৰি এমাহৰ ভিতৰত দুৰ্নীতিত জড়িত সকলক গ্ৰেপ্তাৰ কৰি দৃষ্টান্তমূলক শাস্তি দিবৰ বাবে দাবী জনায় । উল্লেখ্য যে, এমাহৰ ভিতৰত দুৰ্নীতিৰ বিৰুদ্ধে উচিত তদন্ত নহলে কৃষক মুক্তি সংগ্ৰাম সমিতিয়ে পুনৰ জংগী আন্দোলনৰ কাৰ্যসূচী গ্ৰহণ কৰিব বুলি হুংকাৰ দিয়ে ।