কামৰূপ জিলাৰ বকো আৰক্ষী থানাৰ অন্তৰ্গত কালাহিকাচ গাঁওৰ প্ৰাক্তন ভাৰতীয় সেনা বিষয়া মহাম্মদ সোনাউল্লাহক বিদেশী বুলি ঘোষণা কৰি ডিটেনচন কেম্পলৈ প্ৰেৰণ কৰিছে ।
বকো বিদেশী ন্যায়াধীশকৰনে ২০১৮ চনৰ ৪ চেপ্তেম্বৰত মহম্মদ সোনাউল্লাহলৈ জাননী জাৰি কৰিছিল আৰু মংগলবাৰে তেওঁক বিদেশী বুলি ঘোষণা কৰে ।
কামৰূপৰ অতিৰিক্ত এচ পি সঞ্জীৱ শইকীয়াৰ মতে ২০০৮ চনত কামৰূপ বিদেশী ন্যায়াধীশকৰনত এটা গোচৰ ৰুজু কৰা হৈছিল । ন্যায়াধীশকৰনৰ ৰায়ৰ পাছত প্ৰাক্তন সেনা বিষয়া গৰাকীক গোৱালপাৰাৰ ডিটেনচন কেম্পত ৰখা হৈছে। কিন্তু তেওঁৰ পৰিয়ালে ন্যায়ৰ বাবে গুৱাহাটী উচ্চ ন্যায়ালয়ৰ কাষ চাপিব বুলি প্ৰকাশ কৰিছে ।
উল্লেখ্য যে প্ৰাক্তন সেনা বিষয়া আৰু তেওঁৰ পত্নী সদভানু বিবি, জীয়েক শ্বেহনাজ আখটাৰ, হেলমিনা আখটাৰ আৰু পুত্ৰ চাহিত আলীৰ নাম এন আৰ চিৰ তালিকাটো প্ৰকাশ পোৱা নাই । তেওঁৰ পৰিয়ালৰ সদস্য, দুজন ডাঙৰ ককায়েক স্বৰ্গীয় হানিফ আলী আৰু বাৰেক আলীৰ নাম এন আৰ চিৰ তালিকাত আছে ।
সোনাউল্লাহক ভাগিনিয়েক ৰাজাব আলীয়ে কয় যে সোনাউল্লাহ জন্ম হৈছিল কামৰূপ জিলাৰ চয়গাঁওৰ কলহীকাষ গাঁওত ১৯৬৭ চনৰ ৩০ জুলাইত জন্ম হৈছিল । ১৯৮৫ চনত বকোৰ চাম্পুপাৰা চৰকাৰী হাইস্কুলৰ পৰা মেট্ৰিকত উৰ্ত্তীৰ্ণ হৈছিল । তাৰ পাছত বৰপেটা জিলাৰ চেঙা কলেজত অধ্যয়ন কৰে। তেওঁ ২০১৭ চনৰ ৩১ মেত ভাৰতীয় সেনাৰ পৰা অৱসৰ লয় । ২০১৮ চনত অসম আৰক্ষীৰ সীমান্ত শাখাত আৰক্ষী উপ-পৰিদৰ্শক হিচাপে যোগদান কৰে । কামৰূপ জিলাৰ বাইহাতা চাৰিআলি আৰক্ষী থানাতো কাৰ্যনিৰ্বাহ কৰিছিল । ২০১৪ চনৰ ২ চেপ্তেম্বৰত ৰাষ্ট্ৰপতিৰ পৰা প্ৰসংশাৰ মানপত্ৰ লাভ কৰিছিল সোনাউল্লাহে ।
অধিক খবৰৰ বাবে পঢ়ক :ৰাজ্যিক বাতৰি