বটদ্ৰৱা থানত ৫৭০ সংখ্যক 'গুৰু জয়ন্তী' উৎসৱ উদযাপনৰ প্ৰস্তুতি

মহাপুৰুষ শ্ৰীমন্ত শংকৰদেৱৰ পবিত্ৰ জন্মস্থান শ্ৰী শ্ৰী বটদ্ৰৱা থানত অহা ১,২ আৰু ৩ আহিন (১৮,১৯ আৰু ২০ ছেপ্তেম্বৰ,২০১৮) মঙ্গল,বুধ আৰু বৃহস্পতিবাৰে ৫৭০ সংখ্যক গুৰু জয়ন্তী উৎসৱ ভাগ আড়ম্বৰপূৰ্ণভাৱে তিনিদিনীয়া কাৰ্যসূচীৰে উদযাপন কৰাৰ প্ৰস্তুতি চলিছে।কাৰ্যসূচী অনুসৰি ১ আহিন ১৮ ছেপ্তেম্বৰ মঙ্গল বাৰে পুৱা থানৰ নিত্য- নৈমিত্তিক প্ৰসঙ্গৰ পিছত দিনৰ ১ বজাৰ পৰা অনুষ্ঠিৰ হ'ব লগীয়া অসম ভিত্তিত বৰগীত প্ৰতিযোগিতাৰ শুভ উদ্বোধন কৰিব শ্ৰী শ্ৰী নৰোৱা সত্ৰৰ সত্ৰাধিকাৰ তথা বটদ্ৰৱা থান পৰিচালনা সমিতিৰ সভাপতি দেৱানন্দ দেৱ গোস্বামীয়ে। দিনৰ ২ বজাত গুৰু চৰিত পাঠ । সন্ধিয়া ৬ বজাত অসম ভিত্তিত দিহানাম প্ৰতিযোগীতাৰ শুভ উদ্বোধন কৰিব শ্ৰী শ্ৰী শলগুৰি সত্ৰৰ সত্ৰাধিকাৰ তথা বটদ্ৰৱা থান পৰিচালনা সমিতিৰ উপ সভাপতি পৰমানন্দ দেৱ মহন্তই। ২ আহিন ১৯ ছেপ্তেম্বৰ বুধবাৰে সাংস্কৃতিক শোভাযাত্ৰা উদ্বোধন কৰিব বটদ্ৰৱা থান পৰিচালনা সমিতিৰ কাৰ্যকৰী সভাপতি ভোগেশ্বৰ বৰাই।সন্ধিয়া ৬ বজাত বটদ্ৰৱা থান আৰু দৌল মন্দিৰ প্ৰাঙ্গনত ৫৭০ গছি বন্তি প্ৰজ্বলন কৰিব যোগেশ বৰ নামলগোৱা আৰু দেবেন আতৈয়ে । নিশা ৯ বজাত শ্ৰী শ্ৰী শলগুৰি সত্ৰৰ ৰাইজে " নৃসিংহ যাত্ৰা" ভাওনা প্ৰদৰ্শন কৰিব ।