ৰাজ্যিক বন মন্ত্ৰী পৰিমল শুক্লবৈদ্যয়ে মংগলবাৰে বন বিভাগৰ সকলো দুৰ্নীতিগ্ৰস্থ বন বিষয়াক সকিয়নি প্ৰদান কৰিছে । ১৫ দিনৰ সময় সীমাৰ ভিতৰত সকলো দুৰ্নীতি সম্পৰ্কীয় কাম বন্ধ কৰি , যি সমূহ ৰাজহ লোকচানৰ সন্মুখীন হৈছে সেয়া ওভতাই আনিবলৈ নিৰ্দেশ দিছে ।
গুৱাহাটী আৰু সোনাপুৰ অঞ্চলত এশৰো অধিক অবৈধ শিল বালি কঢ়িওৱা ট্ৰাক প্ৰতক্ষ্য কৰাৰ পাছতে বন মন্ত্ৰী পৰিমল শুক্লবৈদ্যয়ে এই কঠোৰ নিৰ্দেশ প্ৰদান কৰিছে । আনহাতে অফিচিয়েল তথ্য মতে, কেইখন মান বন সম্পদ কঢ়িওৱা ট্ৰাক পাৰ হৈছে ।
গুৱাহাটী আৰু সোনাপুৰৰ চিচিএফ , চেন্ট্ৰেল জন, পিচিচিএফ, পূব কামৰূপ ডি এফ অ আৰু বীট অফিচাৰ সকলৰ সৈতে জৰুৰী বৈঠকত মিলিত হৈছিল । এই বৈঠকতে গুৱাহাটী আৰু সোনাপুৰৰ বন বিষয়া সকলক সকলো অবৈধ ব্যবসায় বন্ধ কৰিবলৈ কঠোৰ নিৰ্দেশ দিছে বন মন্ত্ৰী পৰিমল শুক্লবৈদ্যয়ে ।
লগতে পৰিমল শুক্লবৈদ্যয়ে প্ৰকাশ কৰে যে, " দায়িত্ব গ্ৰহণ কৰাৰ পিছত তেওঁ নিজেই বহু অঞ্চল ব্যক্তিগত ভাৱে পৰিদৰ্শন কৰি অবৈধ ব্যবসায় বন্ধ কৰিছে । এনে অবৈধ ব্যবসায়ৰ বিৰুদ্ধে বহুতো ব্যৱস্থা গ্ৰহণ কৰিছো । এনে অবৈধ ব্যবসায়ত এচাম বন বিষয়া জৰিত থকাৰ কথা অস্বীকাৰ কৰা নাই । এনে কৰ্মকাণ্ডৰ বিৰুদ্ধে কঠোৰ ব্যৱস্থা গ্ৰহণ কৰা হব বুলি প্ৰকাশ কৰে । দুৰ্নীতিৰ বিৰুদ্ধে শূণ্য সহনশীল এইখন চৰকাৰ । অবৈধ ব্যবসায়ৰ বিৰুদ্ধে শীঘ্ৰেই ব্যবস্থা গ্ৰহণ কৰা হব বুলি প্ৰকাশ কৰে বন মন্ত্ৰী পৰিমল শুক্লবৈদ্যয়ে ।
