ক'ৰ'না ভাইৰাছৰ পৰিস্থিতি মোকাবিলাঃ সৰ্বদলীয় বৈঠক আয়োজনক আদৰণি গগৈৰ

ক’ৰ’না ভাইৰাছৰ পৰিস্থিতি মোকাবিলাঃ সৰ্বদলীয় বৈঠক আয়োজনক আদৰণি গগৈৰ। প্ৰাক্তন মুখ্যমন্ত্ৰী তৰুণ গগৈয়ে মুখ্যমন্ত্ৰী সৰ্বানন্দ সোণোৱালে ক’ৱিড-১৯সৃষ্ট পৰিস্থিতি মোকাবিলাৰ বাবে লোৱা সৰ্বদলীয় বৈঠক আয়োজনৰ সিদ্ধান্তক আদৰণি জনাইছে।

শনিবাৰে এক বিজ্ঞপ্তিত গগৈয়ে কয়, " মই এই পদক্ষেপক আদৰণি জনাইছোঁ। বৈঠকত মই অংশগ্ৰহণ কৰিম আৰু মোৰ মন্তব্য প্ৰদান কৰিম । আশা কৰো যে ৰাজ্যৰ চৰকাৰে চিকিৎসক , অৰ্থনীতিবিদ, শিল্পপতি, ব্যৱসায়ী, শ্ৰমজীৱী , কৃষক , নিবনুৱা আৰু অন্য লোকসকলৰ বাবে আয়ৰ উৎসৰ ব্যৱস্থা কৰিব। মই মুখ্যমন্ত্ৰীক অনুৰোধ জনাম যে ক’ৱিড-১৯ ৰ বাবে দেশত দেখা দিয়া অৰ্থনৈতিক সংকট দূৰ কৰাৰ বাবে উপায় উলিযায় "।

লগতে তেওঁ কয় যে অসমে কেৰালা চৰকাৰক অনুসৰণ কৰাৰ প্ৰয়োজন হৈছে ৷ কাৰণ দক্ষিণৰ ৰাজ্যখনে ক’ৰ’না ভাইৰাছৰ প্ৰকোপৰ ৰক্ষা পাবৰ বাবে আৰু অৰ্থনৈতিক সংকট দূৰ কৰাৰ বাবে বিভিন্ন পদক্ষেপ হাতত লৈছে।‌ কেৰালাত অসমৰ দৰে বহু একেধৰণৰ বস্তু আছে । কেৰালা চৰকাৰে অতি সোনকালেই পৰীক্ষাৰ ব্যৱস্থা কৰিছে আৰু সকলো সাৰ্বজনিক স্বাস্থ্য সুবিধা জনতালৈ প্ৰেৰণ কৰিছে ।‌ তেওঁলোক সামাজিক দূৰত্ব বজাই ৰাখিয়েই কৃষি কৰ্ম অব্যাহত ৰাখিছে । কৃষক আৰু অন্য লোক সকলৰ লাভৰ বাবে এনেধৰণৰ ব্যৱস্থা অসমে হাতত ল'ব পাৰে।

লগতে তেওঁ কয় যে " ৰাজ্য চৰকাৰে কিছু ৰাজ্যৰ কিছুমান বিশিষ্ট যোজনা ল'ব লাগে কিয়নো অন্য ৰাজ্যতকৈ পৃথক যেনে বান সমস্যাও আছে । আশা কৰো যে ৰাজ্য চৰকাৰে জনতাৰ স্বাস্থ্য আৰু অৰ্থনীতিৰ ক্ষেত্ৰত উচিত ব্যৱস্থা ল'ব "।

অন্য খবৰৰ বাবে পঢ়ক: অসমত দুই-তিনি মাহৰ বাবে পৰ্যাপ্ত খাদ্য-সামগ্ৰী মজুত আছে : ফণীভূষণ চৌধুৰী

ভিডিঅ প্ৰতক্ষ্য কৰক: SEBA will declare Results of HSLC-High Madrasa within 30 days from repeal of lockdown