নতুন কৃষি বিধেয়ক তিনিখনক লৈ দেশজোৰা প্ৰতিক্ৰিয়া অব্যাহত থকাৰ সময়তে প্ৰধানমন্ত্ৰী নৰেন্দ্ৰ মোদীয়ে কয় যে এই বিধেয়ক তিনিখনে কৃষকসকলক তেওঁলোকৰ উৎপাদিত সামগ্ৰী বিক্ৰীত সহায় কৰিব ৷ উল্লেখ্য যে সংসদত এই বিধেয়ক তিনিখন গৃহীত হৈছে ৷ ৰাষ্ট্ৰপতি ৰামনাথ ক'ৱিন্দে বিধেয়ককেইখনত স্বাক্ষৰ কৰাৰ লগে লগে বিধেয়ককেইখন আইনত পৰিণত হ'ব ৷
আত্মনিৰ্ভৰ ভাৰত নিৰ্মাণত কৃষকসকলৰ বৰঙণিক প্ৰশংসা কৰি দেওবাৰে প্ৰধানমন্ত্ৰী মোদীয়ে কয় যে যিদৰে ২০১৪ত ফলমূল আৰু শাক-পাচলিক কৃষি উৎপাদিত সামগ্ৰী বিপনন আইনৰ গণ্ডীৰ পৰা বাহিৰলৈ অনাৰ পাছত সংশ্লিষ্টসকল উপকৃত হৈছে , তেনেদৰে এই বিধেয়ককেইখনৰ জৰিয়তে কৃষকসকল উপকৃত হ'ব। মোদীয়ে লগতে কয় যে কৃষকসকলে নিজৰ উৎপাদিত সামগ্ৰী যিকোনো স্থানলৈ প্ৰেৰণ কৰিবলৈ সক্ষম হ'ব আৰু ভাল মূল্য লাভ কৰিব ৷
৬৯সংখ্যক মন কী বাত অনুষ্ঠানত কৃষি বিধেয়ককেইখন সম্পৰ্কত এনে দিশসমূহ আঙুলিয়াই দি প্ৰধানমন্ত্ৰীয়ে আৰু কয় যে কঠোৰ আইনৰ বাবে পূৰ্বে কৃষকসকলে নিজৰ উৎপাদিত সামগ্ৰী বিক্ৰী কৰিবলৈ সক্ষম হোৱা নাছিল ৷ এতিয়াৰে পৰা এনে কোনো হেঙাৰ নাথাকিব বুলি তেওঁ উল্লেখ কৰে৷মোদীয়ে কয় যে কৃষি সামগ্ৰী বিপনন সমিতিৰ বাহিৰতো কৃষকসকলে উৎপাদিত সামগ্ৰী বিক্ৰী কৰিবলৈ সক্ষম হ'ব ৷
