বাঘজানৰ অগ্নিকাণ্ডস্থলীত কংগ্ৰেছৰ প্ৰতিনিধি দলঃ ক্ষিপ্ৰ ব্যৱস্থা গ্ৰহণৰ দাবী
অইল ইণ্ডিয়া লিমিটেডৰ বাঘজান তৈল ক্ষেত্ৰৰ বিধ্বংসী অগ্নিকাণ্ড নিৰ্বাপনৰ বাবে চৰকাৰক যুদ্ধকালীন ক্ষিপ্ৰতাৰে ব্যৱস্থা গ্ৰহণৰ দাবী উত্থাপন কৰিছে বিৰোধী কংগ্ৰেছে ৷ শুকুৰবাৰে প্ৰদেশ কংগ্ৰেছৰ সভাপতি ৰিপুন বৰাৰ নেতৃত্বত দলৰ এটা প্ৰতিনিধি দল এই অগ্নিকাণ্ডস্থলীত উপস্থিত হয় ৷ পাছত প্ৰদেশ কংগ্ৰেছৰ সভাপতি বৰাই সাংবাদিকৰ আগত কয়, " আমি অগ্নিকাণ্ডস্থলীত উপস্থিত হৈ পৰিস্থিতিৰ বুজ লওঁ। ইয়াৰ পূৰ্বে কালি আমি ৰাজ্যপালক স্মাৰকপত্ৰ দাখিল কৰো ৷ আমি এই বিধ্বংসী অগ্নিকাণ্ড যুদ্ধকালীন ক্ষিপ্ৰতাৰে নিৰ্বাপনৰ ব্যৱস্থা কৰিবলৈ চৰকাৰক দাবী জনাইছো৷ কেন্দ্ৰীয় চৰকাৰ, ৰাজ্য চৰকাৰ আৰু অইল ইণ্ডিয়া লিমিটেডে যুদ্ধকালীন ক্ষিপ্ৰতাৰে ব্যৱস্থা গ্ৰহণ কৰক "৷ বৰাই লগতে এই অগ্নিকাণ্ডত ক্ষতিগ্ৰস্ত পৰিয়ালবৰ্গক উপযুক্ত ক্ষতিপূৰণ আদায় দিবলৈও চৰকাৰৰ প্ৰতি দাবী জনায় ৷ তেওঁ আৰু কয় যে কংগ্ৰেছৰ প্ৰতিনিধি দলটোৱে অইল ইণ্ডিয়া লিমিটেডৰ মুখ্য পৰিচালন সঞ্চালককো সাক্ষাৎ কৰিব ৷
ইয়াৰ পূৰ্বে কালি প্ৰদেশ কংগ্ৰেছৰ এটা দলে ৰাজ্যপাল জগদীশ মুখীক সাক্ষাৎ কৰে ৷ এই সাক্ষাতৰ সময়ত কংগ্ৰেছৰ প্ৰতিনিধি দলটোৱে ৰাজ্যপালক স্মাৰকপত্ৰ দাখিল কৰে ৷ ইপিনে, বাঘজান কাণ্ডৰ বাবে প্ৰদেশ কংগ্ৰেছে ৰাজ্য চৰকাৰক কঠোৰ ভাষাৰে সমালোচনা কৰিছে ৷ কালি বিধায়িনী দলৰ মুৰব্বী তথা অসম বিধানসভাৰ বিৰোধী দলপতি দেবব্ৰত শইকীয়াই মুখ্যমন্ত্ৰী সৰ্বানন্দ সোণোৱালক তীব্ৰ সমালোচনা কৰে ৷ মুখ্যমন্ত্ৰী সোণোৱালে এই পৰ্যন্ত অগ্নিকাণ্ডস্থলীত উপস্থিত নোহোৱাৰ বাবে তেওঁক বিৰোধী দলপতিজনে সমালোচনা কৰে ৷ তৈল ক্ষেত্ৰখনৰ অগ্নিকাণ্ডৰ বিষয়টোক মুখ্যমন্ত্ৰীয়ে গুৰুত্বসহকাৰে লোৱা নাই বুলি শইকীয়াই সমালোচনা কৰে ৷
আৰু পঢ়িব পাৰেঃ বাঘজানৰ অগ্নিকাণ্ডঃ মুখ্যমন্ত্ৰীৰ উচ্চ পৰ্যায়ৰ বৈঠক