ৰাজ্যৰ পৰা নিষিদ্ধ ড্ৰাগছ আৰু অবৈধ অস্ত্ৰৰ বিভীষিকা দূৰ কৰাৰ উদ্দেশ্যে অসম আৰক্ষীয়ে দৃঢ় আৰু ধাৰাবাহিক পদক্ষেপ গ্ৰহণ কৰি আহিছে ৷ এই মন্তব্য অসম আৰক্ষীৰ সঞ্চালকপ্ৰধান(ডি জি পি)ভাস্কৰজ্যোতি মহন্তৰ ৷ ক'ৰ'না মহামাৰীৰ পৰা আৰোগ্য লাভ কৰি কালি ডি জি পি মহন্তই পুনৰ কৰ্তব্যত যোগদান কৰে ৷ পাছত তেওঁ এখন সংবাদমেলত কয় যে ড্ৰাগছ আৰু অবৈধ অস্ত্ৰৰ বিভীষিকা দূৰ কৰাৰ বাবে আৰক্ষীক ৰাইজৰো সহযোগিতাৰ প্ৰয়োজন।
" সমাজক অপৰাধমুক্ত কৰাত প্ৰতিজন নাগৰিকেই সহায় আগবঢ়াব পাৰে ৷ ইয়াৰ বাবে আৰক্ষীৰ পোচাক পিন্ধাৰ প্ৰয়োজন নাই," ডি জি পিগৰাকীয়ে এইদৰে কয় ৷ তেওঁ আৰু কয় যে ড্ৰাগছ বিক্ৰী, ড্ৰাগছৰ সৰবৰাহ আৰু যুৱ প্ৰজন্মক ড্ৰাগছ সেৱন কৰাবলৈ প্ৰলোভিত কৰাৰ সম্পৰ্কীয় বহু গোচৰ অসম আৰক্ষীয়ে ৰুজু কৰিছে ৷এই বছৰৰ ২৬ জুনৰ পৰা ৩১আগষ্টৰ ভিতৰত এনে ৬০১টা গোচৰ আৰক্ষীয়ে ৰুজু কৰে আৰু এহেজাৰজন ব্যক্তিক গ্ৰেপ্তাৰ কৰে ৷ তদুপৰি উক্ত সময়ছোৱাত আৰক্ষীয়ে ১০কিলোগ্ৰাম হেৰ'ইন, বৃহৎ পৰিমাণৰ গাঞ্জা, ৮হেজাৰ কিলোগ্ৰাম ভাং আৰু ড্ৰাগছ আসক্তই ব্যৱহাৰ কৰা ৫০হেজাৰ কফ ছিৰাপ জব্দ কৰে ৷ ইয়ে অসম আৰক্ষীৰ সতৰ্কতাকে সূচায় বুলি মহন্তই মন্তব্য কৰে ৷
আৰু পঢ়িব পাৰেঃ বিগত বৰ্ষৰ ৰাজ্যিক বাজেটৰ অব্যৱহৃত হৈ ৰ'ল ৩২.৩০শতাংশ ধন
