ক'ৰ'না মহামাৰী সম্পৰ্কীয় ব্হুল সজাগতা সৃষ্টিৰ উদ্দেশ্যে ৰাজ্য চৰকাৰে এক ব্যাপক কাৰ্যসূচী হাতত লৈছে। আজি বুধবাৰৰ পৰা আৰম্ভ হোৱা এই কাৰ্যসূচীয়েই হৈছে ৰাজ্যত ক'ৱিড সজাগতা সম্পৰ্কীয় ব্যাপক কাৰ্যসূচী ৷ এই কাৰ্যসূচীৰ ক্ষেত্ৰত মূল গুৰুত্ব দিয়া হ'ব ক'ৰ'না পৰীক্ষাৰ ক্ষেত্ৰত ৷ সকলোকে স্বেচ্ছাই ক'ৰ'নাৰ নমুনা পৰীক্ষাৰ বাবে আগবাঢ়ি আহিবলৈ অনুৰোধ জনোৱা হ'ব ৷ একেদৰে ক'ৰ'না মহামাৰী প্ৰতিৰোধৰ বাবে বান্ধি দিয়া নীতি-নিয়মসমূহ সকলোকে মানি চলিবলৈ আহ্বান জনোৱা হ'ব ৷
উল্লেখ্য যে ৰাজ্যৰ স্বাস্থ্য বিভাগে অহা ২৮-ৰ পৰা ৩০ছেপ্টেম্বৰলৈ তিনিটা পৰ্যায়ত দুই লক্ষৰো অধিক পৰীক্ষা সম্পন্ন কৰাৰ লক্ষ্য লৈছে ৷ এই গণ জাগৰণ কাৰ্যসূচীত বয়সস্থ ব্যক্তি, ১০বছৰ বয়সৰ তলৰ শিশু আৰু আন জটিল ৰোগত আক্ৰান্ত ব্যক্তিক মূল গুৰুত্ব আৰোপ কৰা হ'ব ৷
এই জনসজাগতা সৃষ্টিত এন জি অ', অৰুণোদয় সহায়ক-সহায়িকা, আত্মসহায়ক গোট,গাঁও অনাময় আৰু পৰিপুষ্টি সমিতি, জি এন এম আদিক জড়িত কৰা হ'ব ৷ এনেদৰে ৰাজ্যত ক'ৰ'না মহামাৰী বিৰোধী যুঁজখন প্ৰবল কৰি তুলিব বিচৰা হৈছে ৷ এই কাৰ্যসূচীৰ জৰিয়তে ক'ৰ'না পৰীক্ষা কৰোৱা লোকৰ সংখ্যা বৃদ্ধি পাব বুলি আশা কৰা হৈছে ৷
আৰু পঢ়িব পাৰেঃ আই আই টি গুৱাহাটীৰ ছাত্ৰ-ছাত্ৰীক ষ্টাৰ্ট-আপ স্থাপনৰ আহ্বান
