ৱাটছএপ গ্ৰুপত নিষিদ্ধ ড্ৰাগছ সম্পৰ্কীয় কথা পতাৰ কথা জেৰাত স্বীকাৰ কৰিলে অভিনেত্ৰী দীপিকা পাড়ুকনে ৷ আজি পুৱা ১০বজাৰ পৰা নাৰ্ক'টিকছ কন্ট্ৰ'ল ব্যুৰ'ৱে অভিনেত্ৰীগৰাকীক ড্ৰাগছ সম্বন্ধীয় গোচৰত বহু সময় ধৰি জেৰা কৰে ৷ এই জেৰাৰ সময়ত তেওঁ তদন্তকাৰী বিষয়াৰ আগত ৱাটছএপ গ্ৰুপত ড্ৰাগছ সম্বন্ধীয় কথা পতাৰ কথা স্বীকাৰ কৰে ৷ অৱশ্যে জেৰাৰ সময়ত তেওঁ দিয়া কেতবোৰ প্ৰশ্নৰ উত্তৰক লৈ এন চি বিৰ তদন্তকাৰী বিষয়া সন্তুষ্ট নহয় বুলি সূত্ৰই জনায় ৷ সূত্ৰই জনোৱা মতে, দীপিকাই তেওঁৰ মেনেজাৰ কৰিশ্মা প্ৰকাশৰ সৈতে ৱাটছএপত ড্ৰাগছৰ বিষয়ে কথা পতাৰ অভিযোগ মানি লয় ৷ অভিযোগ অনুসৰি ২০১৭ৰ অক্টোবৰত দীপিকাই তেওঁৰ কৰিশ্মাৰ সৈতে ড্ৰাগছ সম্বন্ধীয় কথা পাতিছিল ৷
আজি দ্বিতীয়বাৰৰ বাবে এন চি বিয়ে কৰিশ্মাক জেৰা কৰে ৷ আনহাতে, দীপিকাৰ কোম্পানী KWANও তদন্তকাৰীৰ দৃষ্টিলৈ আহিছে ৷ ইয়াৰ ভূমিকাও সন্দেহৰ আৱৰ্তত আছে ৷ তদুপৰি দীপিকাৰ "ক'ক' পাৰ্টীয়েও সন্দেহৰ উদ্ৰেক কৰিছে ৷ ইপিনে, জেৰাৰ সময়ত দীপিকাৰ মেনেজাৰ কৰিশ্মাই "হাশ্ব" ড্ৰাগছ নহয় বুলি দাবী কৰা বুলি সূত্ৰই জনায় ৷ উল্লেখ্য যে ২০১৭ৰ অক্টোবৰত ৱাটছএপ গ্ৰুপত দীপিকাই কৰিশ্মাক "মাল" আৰু "হাশ্ব" যোগান ধৰিবলৈ নিৰ্দেশ দিছিল ৷
