আগন্তক ২০২১ৰ বিধানসভা নিৰ্বাচনতো বিজেপিয়ে পুনৰ জয়লাভ কৰিব। আজি গৃহ সমষ্টি জাগীৰো়ডত এখন সভাত এই দাবী কৰে ৰাজ্যিক স্বাস্থ্য মন্ত্ৰী পীযুষ হাজৰিকাই। সদৌ অসম ছাত্ৰ সন্থা(আছু)-ক কটাক্ষ কৰি মন্ত্ৰীজনে কয় যে আছুৱে যি ৰাজনৈতিক দল গঠন কৰিব, সেই দল তেনেই নিশকটীয়া হব। বিধানসভা নিৰ্বাচনলৈ মাজত মাথোঁ কেইটামান মাহ বাকী থকা অৱস্থাত সমগ্ৰ অসমতে আছুৰ বহু নেতা-কৰ্মীয়ে বিজেপিত য়োগদান কৰিছে বুলি হাজৰিকাই মন্তব্য কৰে। লগতে ৰাজ্যৰ ৭০ সংগঠনকো তাচ্ছিল্য কৰি মন্ত্ৰীজনে আৰু কয়, "৭০টা সংগঠনত ৭০টা মানুহ আছে ৷ এনেকুৱা সংগঠনো আছে য'ত দুই তিনিজন ব্যক্তি আছে ৷ সেয়েহে ৭০ টা সংগঠনলৈ আমি ভয় নকৰো ৷ ২০২১-ৰ বিধানসভা নিৰ্বাচনত আমি আকৌ জয়ী হ'ম ৷
ইফালে সমগ্ৰ ৰাজ্যতে বিতৰ্কৰ সৃষ্টি হোৱা জনপ্ৰিয় সংগীত শিল্পী জুবিন গাৰ্গ সন্দৰ্ভতো প্ৰতিক্ৰিয়া প্ৰকাশ কৰে মন্ত্ৰী হাজৰিকাই৷ তেওঁ কয় যে জুবিনে উচিত সময়ত উচিত সিদ্ধান্ত লৈছে ৷ উক্ত সভাত মন্ত্ৰী পীয়ুষ হাজৰিকাৰ উপস্থিতিত কংগ্ৰেছ, অগপ, আৰু ছাত্ৰ সন্থাৰ প্ৰায় ৬২৭ গৰাকী নেতা-কৰ্মী সহ তিৱা ছাত্ৰ সন্থাৰ প্ৰাক্তন সভাপতিয়েও যোগদান কৰে গেৰুৱা দলত৷
