ক'ৰ'না মহামাৰীৰ বিভীষিকাৰ মাজতে অহা ১৩ ছেপ্টেম্বৰত সমগ্ৰ দেশৰ লগতে অসমতো চিকিৎসা বিজ্ঞানৰ পাঠ্যক্ৰমত নামভৰ্তিৰ সৰ্বভাৰতীয় বাছনি পৰীক্ষা (নীট) অনুষ্ঠিত হ'ব ৷ এইবাৰৰ নীটত অৱতীৰ্ণ হ'বলৈ অসমৰো ৩০হেজাৰৰো অধিক ছাত্ৰ-ছাত্ৰীয়েও প্ৰস্তুতি চলাইছে।
চৰকাৰী তথ্য অনুসৰি এইবাৰৰ নীটত অৱতীৰ্ণ হ'বলৈ অসমৰ ৩০, ৩১১ছাত্ৰ-ছাত্ৰীয়ে নিজৰ নিজৰ নাম পঞ্জীয়ন কৰিছে। উল্লেখ্য যে অলপতে অনুষ্ঠিত জে ই ইৰ মূল পৰীক্ষাত অসমত ৫০শতাংশৰো কম ছাত্ৰ-ছাত্ৰী অৱতীৰ্ণ হয়। এই পৰীক্ষা যোৱা এক ছেপ্টেম্বৰৰ পৰা ৬ ছেপ্টেম্বৰলৈ অসমৰ ছটা কেন্দ্ৰত অনুষ্ঠিত হয়।
অৱশ্যে ৰাষ্ট্ৰীয় পৰীক্ষা সংস্থা (এন টি এ)ই নীটত অৱতীৰ্ণ ছাত্ৰ-ছাত্ৰীৰ সংখ্যা বৃদ্ধি পাব বুলি আশা প্ৰকাশ কৰিছে ৷ পৰীক্ষা সুকলমে অনুষ্ঠিত কৰাৰ উদ্দেশ্যে এন টি এ-ৰ সৈতে অসম চৰকাৰ আলোচনাতো মিলিত হৈছে ৷ আগন্তুক নীট সম্পৰ্কত এন টি এ-ৰ মন্তব্য হ'ল যে জে ই ইতকৈ নীটৰ প্ৰতি ছাত্ৰ-ছাত্ৰীৰ আগ্ৰহ অধিক ৷ আনহাতে, পৰীক্ষাত অৱতীৰ্ণ হ'বলৈ অহা ছাত্ৰ-ছাত্ৰীয়ে মাস্ক আৰু সামাজিক দূৰত্ব বৰ্তাই ৰখাটো বাধ্যতামূলক কৰা হৈছে ৷
