কাইলৈ অৰ্থাৎ দেওবাৰে মাজনিশাৰ পৰা গুৱাহাটীত পুনৰ আৰম্ভ হ'ব সম্পূৰ্ণ তলাবন্ধ বা ল'ক-ডাউন ।ক'ৰ'না ভাইৰাছ সৃষ্ট মহামাৰীত আক্ৰান্তৰ সংখ্যা তীব্ৰগতিত বৃদ্ধি পোৱাৰ পৰিপ্ৰেক্ষিতত ৰাজ্য চৰকাৰে মহানগৰীত পুনৰ সম্পূৰ্ণ তলাবন্ধ আৰোপৰ ব্যৱস্থা কৰিছে ৷ কাইলৈৰ মাজনিশাৰ পৰা বলবৎ হ'ব লগা এই তলাবন্ধ অহা ১২জুলাইলৈকে বাহাল থাকিব ৷ লক্ষ্যণীয় যে এই ১৪দিনত তলাবন্ধ কবলিত অঞ্চলসমূহত বিভিন্ন বেংকৰ কেৱল ১০% শাখাহে খোলা থাকিব ৷ এই কথা সদৰী কৰি গুৱাহাটীৰ আৰক্ষী আয়ুক্ত মুন্না প্ৰসাদ গুপ্তাই কয়, " তলাবন্ধৰ সময়ছোৱাত কেৱল বেংকৰ ১০শতাংশ শাখাহে খোলা থাকিব ৷ বেংক কৰ্তৃপক্ষই কোনটো শাখা বেংক খোলা ৰাখিব, তাৰ সিদ্ধান্ত গ্ৰহণ কৰিব ৷ কৰ্মস্থলীত উপস্থিত থাকিবলগীয়া কৰ্মচাৰীক বেংকৰ বিষয়াই বিশেষ পাছ প্ৰদান কৰিব ৷ কেৱল পাছ থকা কৰ্মচাৰীকহে অহা-যোৱা কৰিবলৈ দিয়া হ'ব ৷"
