গোলাঘাট আৰু যোৰহাটত বিষাক্ত সুৰা সেৱন কৰি মৃত্যু হোৱা লোকৰ প্ৰসংগত উত্তপ্ত হয় সোমবাৰৰ বিধানসভা। শাসক বিৰোধী সকলোৱে উক্ত ঘটনাৰ উচিত তদন্ত হোৱাটো বিচাৰিছে ৷ এই সন্দৰ্ভত এজিপিৰ জেষ্ঠ্য বিধায়ক বৃন্দাবন গোস্বামীয়ে কয় যে অৱশ্যে ৰাজ্যত এখন আবকাৰী আইন আছে ৷কিন্তু আইনখন উপযুক্ত ৰূপত সময়মতে বাস্তৱায়িত কৰাৰ ক্ষেত্ৰত গতি সীমিত হৈছে ৷ কেৱল বৃহৎ সংখ্যক আয় উপাৰ্জন কৰিলেই নহ’ব ৷ কাৰণ সুৰাৰ জৰিয়তে আমাৰ উঠি অহা প্ৰজন্মৰ ক্ষেত্ৰত এক বৃহৎ প্ৰভাৱ পৰিব ৷ কংগ্ৰেছৰ নেত্ৰী অজন্তা নেওগে কয় যে, প্ৰতক্ষ্যদৰ্শীয়ে মোক কিছু আবকাৰী বিষয়া আৰু ৰাজ্যত অবৈধ ৰূপত সুৰাৰ ব্যৱসায়ৰ সন্দৰ্ভত অৱগত কৰাইছিল ৷অবৈধ সুৰা সমূহ প্ৰস্তুত কৰোঁতে লালি গুৰ কেনেদৰে ব্যৱহাৰ কৰে ৷ এই সন্দৰ্ভত ন্যায়িক তদন্ত হ’ব লাগে ৷লগতে চাহ বাগান সমূহত স্থানীয় ভাৱে প্ৰস্তুত কৰা চুলাইৰ সন্দৰ্ভত জাগৰণ অনাৰ পদক্ষেপ লোৱাটো অত্যন্ত প্ৰয়োজনীয় ৷
অসম গণ পৰিষদৰ সভাপতি অতুল বৰাৰ কয় যে, সকলোৰে জ্ঞাত যে চাহ বাগানৰ দোকান সমূহত মুকলিকৈ সুৰা বিক্ৰী কৰা হয় ৷ মন কৰিব লগীয়া কথাটো এয়ে যে আবকাৰী বিভাগে কি কৰি থাকে ৷ আবকাৰী বিভাগে সময় মতে সকলো কাম নকৰা কাৰণেই , এনে ধৰণৰ দুৰ্যোগ নামি আহিছে ৷অবৈধ তথা বিষাক্ত সুৰাৰ সন্দৰ্ভত এআইইউডিএফৰ বিধায়ক আমিনুল ইছলামে কয় যে,নিৰ্বাচনৰ পূৰ্বতে, নিৰ্বাচনত প্ৰতিদ্বন্দিতা কৰা ৰাজনৈতিক নেতাসকলে চাহ বাগানসমূহত সুৰা বিতৰণ কৰাটো এক সাধাৰণ কথালৈ পৰিণত হৈছে ৷ দিছপুৰে এই ক্ষেত্ৰত অসমক ড্ৰাই ষ্টেট কিয় ঘোষণা নকৰে? ৷
বিজেপি বিধায়ক তেৰছ গোৱলাই কয় যে প্ৰত্যেক নিৰ্বাচনৰ প্ৰাকমূহুৰ্তত চাহ বাগান সমূহত সুৰা বিতৰণ কৰাটো এক পৰম্পৰা হৈ গৈছে ৷ আমি চাহ বাগানৰ শ্ৰমিকসকলৰ মাজত সুৰা সন্দৰ্ভত এক অভিযান আৰম্ভ কৰাটো অত্যন্ত প্ৰয়োজনীয়। কংগ্ৰেছৰ নেতা ৰকিবুল হুছেইনে কয় যে এই সমগ্ৰ ঘটনাটো হৈছে এটা সামাজিক ব্যাধি ৷ ইয়াৰ পৰা পৰিত্ৰাণ পাবৰ কাৰণে সকলোৱে একত্ৰিত হ’ব লাগিব৷ অসম গণ পৰিষদৰ নেতা ৰমেন্দ্ৰ নাৰায়ন কলিতাই কয় যে অবৈধ সুৰা ব্যৱসায়ত আৰক্ষী আৰু আবকাৰী বিভাগ জড়িত আছে ৷চুলাইত ব্যৱহাৰ কৰিবৰ কাৰণে লালিগুৰ কেনেদৰে আহে ? আৰক্ষীয়ে এই ক্ষেত্ৰত কিয় বিহিত ব্যৱস্থা গ্ৰহণ নকৰে? লালিগুৰৰ ব্যৱহাৰ অসমৰ অন্যান্য ৰাজ্যত বিভিন্ন কামত ব্যৱহাৰ কৰে ৷কিন্তু অসমত লালিগুৰক চুলাই প্ৰস্তুত কৰোঁতে কেঁচা পদাৰ্থ হিছাপে ব্যৱহাৰ কৰা হয়৷
ৰাজ্যৰ চাহ কল্যান মন্ত্ৰী পল্লৱ লোচন দাসে কয় যে প্ৰত্যেক বিধায়কে নিজৰ চাহ বাগান অঞ্চলসমূহত সকলো অবৈধ সুৰা প্ৰস্তুত কৰা ঘাটিক উচ্চেদ কৰিব লাগে ৷ লগতে বিধায়কৰ এই অভিযানত মহিলাসকলে ভাগ লোৱাৰ কথাও উল্লেখ কৰে ৷বিজেপিৰ নেতা সঞ্জয় কিষানে কয় যে, চাহ বাগান সমূহৰ কৰ্তৃপক্ষই সুৰা মুকলিকৈ বিক্ৰী কৰি থকা সকলৰ ক্ষেত্ৰত কিয় সিদ্ধান্ত গ্ৰহণ নকৰে বুলি প্ৰশ্ন কৰে ৷ চাহ বাগান সমূহৰ কৰ্তৃপক্ষকো এনেধৰণৰ ঘটনাৰ কাৰণে দোষী সাব্যস্ত কৰিব লাগে ৷
ইফালে সংসদীয় কাৰ্য মন্ত্ৰী চন্দ্ৰ মোহন পাটোৱাৰীয়ে কয় যে আবকাৰী বিভাগে প্ৰথমতেই আবকাৰী অধিনিয়মক আইনত পৰিণত কৰিলে৷ সম্প্ৰতি কাৰাবাসৰ সময় দীঘলীয়া কৰিব লাগে, লগতে জৰিমনাৰ মাত্ৰা বৃদ্ধি কৰিব লাগে । ইতিমধ্যে চুলাইৰ প্ৰসংগত গোলাঘাট আৰু যোৰহাটত সাতটা গোচৰ দাখিল হৈছে ৷বিষাক্ত চুলাই ফৰেণিছিক পৰীক্ষাও কৰা হৈছে। গতিকে সম্প্ৰতি ৰাজ্যত একত্ৰিত হৈ চুলাইৰ বিৰুদ্ধে অভিযান চলোৱাৰ সময় ৷
এই সমগ্ৰ ঘটনাৰ সন্দৰ্ভত আবকাৰী মন্ত্ৰী পৰিমল শুক্ল বৈদ্যই কয় যে সম্প্ৰতি সকলোৱে আবকাৰী বিভাগক সুৰা ট্ৰেজেডীৰ কাৰণে দোষী সাব্যস্ত কৰিছে ৷কিন্তু আবকাৰী বিষয়া সকলে জিলাৰ উপায়ুক্ত সকলৰ অধীনত কাম কৰে ।বিগত দুটা বৰ্ষত অবৈধ চুলাইৰ মদৰ বিৰুদ্ধে এক বৃহৎ অভিযান চলাই প্ৰায় হাজাৰ লোকক গ্ৰেপ্তাৰ কৰা হৈছে ৷এই ক্ষেত্ৰত গ্ৰেপ্তাৰ কৰা লোক সকলৰ শাস্তি ৩ বছৰলৈ বৃদ্ধি কৰাৰ লগতে জৰিমনা ৫ লাখলৈ বৃদ্ধি কৰা হৈছে ৷ ৰাজ্যখনত সুৰা অধিক বিক্ৰী হোৱাৰ কাৰণে ৰাজহ বৃদ্ধি হোৱা নাই ৷বৰঞ্চ ৰাজহ সংগ্ৰহ প্ৰণালীত বিভিন্ন পৰিৱৰ্তনৰ কাৰণেহে ৰাজহ বৃদ্ধি হৈছে । যদি কোনোৱে বিছাৰে যে মই পদত্যাগ কৰিব লাগে,তেন্তে মই পদত্যাগ কৰিবলৈও সাজু আছো ৷এই মন্তব্য আবকাৰী মন্ত্ৰী পৰিমল শুক্লবৈদ্যৰ।
অধিক খবৰৰ বাবে পঢ়ক : শীৰ্ষ বাতৰি
