ভাৰত মাতা পূজন উদযাপন সমিতিয়ে শিৱসাগৰত আয়োজন কৰা ভাৰত মাতা পূজন আজি আনুষ্ঠানিকভাবে উদ্বোধন কৰে ৰাজ্যিক স্বাস্থ্য আৰু পৰিয়াল কল্যান মন্ত্ৰী পীযুষ হাজৰিকাই । ইয়াৰ পূৰ্বে ভাৰত মাতাৰ প্ৰতিমূৰ্তিৰ সন্মুখত বন্তি প্ৰজ্বলন কৰে শিৱদৌলৰ মুখ্য পুৰোহিত সুৰেশ বৰঠাকুৰে আৰু নাৰিকল ভাঙে যোৰহাটৰ সাংসদ কামাখ্যা প্ৰসাদ তাচাই । প্ৰণতি বৰুৱাৰ পৰিচালনাত এটি মংগলাচৰণেৰে আৰম্ভ হোৱা উদ্বোধনী অনুষ্ঠানত বিধায়ক যোগেন মহন, বিধায়ক কুশল দুৱৰী, আৰক্ষী বিষয়া দেৱাশীষ শৰ্মাকে ধৰি ভালেকেইজন গণ্য মান্য ব্যক্তি উপস্থিত থাকে । অনুষ্ঠানত ভাষণ প্ৰদান কৰি মন্ত্ৰী পীযুষ হাজৰিকাই ভাৰতৰ সংস্কৃতি পৃথিৱীৰ সকলো সংস্কৃতিতকৈ পুৰণি বুলি কৰি উল্লেখ কৰি এই দেশৰ মহান সংস্কৃতি আন ঠাইত দেখিবলৈ পোৱা নাযায় বুলি কয় । ভাৰতীয় দৰ্শনৰ এই মহানতাৰ বাবেই ভাৰত মাতাক সকলোৱে সন্মান জনোৱা উচিত বুলিও মন্ত্ৰীগৰাকীয়ে মত প্ৰকাশ কৰে । প্ৰসংগক্ৰমে ভাৰতবৰ্ষই বিশ্বৰ আগশাৰীৰ দেশৰ সৈতে ফেৰ মাৰিব পাৰিছে বুলিও উল্লেখ কৰি এই দেশ বিশ্ব গুৰুৰ আসনত উপবিষ্ট হ'ব বুলি কয় ।
