গুৱাহাটীঃ গুৱাহাটীৰ গীতানগৰ থানাত সোমবাৰে হিন্দু সংগঠন কুটুম্ব সুৰাখা পৰিষদে পাঠান ছবিৰ বিৰুদ্ধে এফআইআৰ দাখিল কৰে। "বেশৰাম ৰং" গীতটোৰ বাবেই পৰিষদে ছবিখনৰ বিৰুদ্ধে অভিযোগ উত্থাপন কৰে। "ৰাষ্ট্ৰীয় পতাকাৰ প্ৰাথমিক ৰং গেৰুৱা ৰং। সনাতন ধৰ্মৰ পূজনীয় প্ৰতিনিধিত্বও হয় এই ৰং।কিন্তু ছবিখনত ইয়াক যি ধৰণেৰে চিত্ৰিত কৰা হৈছে সেয়া অত্যন্ত লজ্জাজনক বুলি অভিযোগ সংগঠনটোৰ প্ৰতিষ্ঠাপক সভাপতি সত্য ৰঞ্জন বৰাৰ ।
তেওঁ দৃঢ়তাৰে কয় যে জাতীয় প্ৰতীক, ভাৰতৰ চহকী সাংস্কৃতিক ইতিহাসৰ ৰং আৰু ভাৰতীয় সন্ন্যাসীসকলে কৰা লাখ লাখ বলিদানৰ প্ৰতীক গেৰুৱা ৰং ছবিখনত চিত্ৰিত কৰা ধৰণে "বেশৰাম ৰং" (নিৰ্লজ্জ ৰং) হ'ব নোৱাৰে। চিনেমাখনৰ প্ৰযোজক, পৰিচালক, পৰিবেশক, আৰু বাকী অভিনেতা-অভিনেত্ৰীসকলে এই কাম কৰি জাতি, জাতীয় গৌৰৱ, সনাতন ধৰ্ম, সন্ন্যাসীসকলৰ উচ্চ আৰু নিস্বাৰ্থ ত্যাগক ক্ষুন্ন কৰিছে। ভাৰতীয় সংবিধানৰ ৫১ অনুচ্ছেদকো অমান্য কৰিছে চিনেমাখনে।