বহুচৰ্চিত দুখন কৃষি বিধেয়কক লৈ সদনত সৃষ্টি কৰা হুলস্থুলীয়া পৰিৱেশৰ বাবে সদনৰ পৰা নিলম্বিত হ'ল অসমৰ ৰিপুন বৰাসহ ৰাজ্যসভাৰ আঠ বিৰোধী সাংসদ ৷ ইয়াৰ পৰিপ্ৰেক্ষিতত এই আঠ সাংসদে চলিত গ্ৰীষ্মকালীন অধিৱেশনৰ বাকী থকা দিনকেইটাত সদনত উপস্থিত থাকিব নোৱাৰিব ৷ সদনৰ পৰা নিলম্বিত আন সাতগৰাকী সাংসদ হ'ল তৃণমূল কংগ্ৰেছৰ দোলা সেন, আম আদমী পাৰ্টীৰ সঞ্জয় সিং, কংগ্ৰেছৰ ৰাজীৱ সতৱ আৰু ছৈয়দ নাছিৰ হুছেইন, চি পি আই(এম)-ৰ কে কে ৰাগেশ আৰু ইলামাৰাম কৰিম ৷
উল্লেখ্য যে দেওবাৰে ৰাজ্যসভাত দুখন কৃষি বিধেয়ক গৃহীত হয় ৷ এই বিধেয়ক দুখন হৈছে কৃষকৰ উৎপাদন ব্যৱসায় আৰু বাণিজ্য( উন্নীতকৰণ আৰু সহজকৰণ), ২০২০ আৰু কৃষকসকল (সবলীকৰণ আৰু সুৰক্ষা), ২০২০বিধেয়ক ৷ সম্প্ৰতি এই বিধেয়ক দুখন স্বাক্ষৰৰ বাবে ৰাষ্ট্ৰপতিলৈ প্ৰেৰণ কৰা হ'ব ৷
আনহাতে, বিধেয়ক দুখন ৰাজ্যসভাত উত্থাপনৰ সময়ত কংগ্ৰেছকে ধৰি বিৰোধী দলসমূহে হুলস্থুলীয়া পৰিৱেশৰ সৃষ্টি কৰে ৷ তৃণমূলৰ সাংসদসকলে সদনৰ অধ্যক্ষৰ মঞ্চত উঠি বিধেয়ক দুখনক লৈ আলোচনাৰ দাবী তুলি হুলস্থুলীয়া পৰিৱেশৰ সৃষ্টি কৰে ৷ ইয়াক লৈ তীব্ৰ বেথাৰে অধ্যক্ষ তথা উপ-ৰাষ্ট্ৰপতি ভেংকয়া নাইডুৱে কয় যে এই সাংসদসকলৰ আচৰণে তেওঁক গভীৰ পীড়া দিছে ৷ অৱশেষত অধ্যক্ষই সাংসদকেইজনক নিলম্বিত কৰে। এই সাংসদকেইজনক অধিৱেশনৰ বাকী থকা সময়ছোৱাৰ বাবে নিলম্বিত কৰা কাৰযক গৰিহণা দিছে সাংসদ গৌৰৱ গগৈয়ে।
আৰু পঢ়িব পাৰেঃ ২০২১ৰ নিৰ্বাচনঃ বাঙালী হিন্দুৱেও খুলিব ৰাজনৈতিক দল !
