গুৱাহাটীঃ অবৈধ IPL বেটিং আৰু ধন সৰবৰাহৰ অভিযোগত প্ৰৱৰ্তন সঞ্চালকালয় (ED)-ৰ গুৱাহাটী জ’নেল কাৰ্যালয়ে অসম আৰু নতুন দিল্লীৰ একাধিক স্থানত গোটেই নিশা অভিযান চলায়।
ধন সৰবৰাহ প্ৰতিৰোধ আইন-(Prevention of Money Laundering Act)-ৰ অধীনত চলোৱা এই অভিযানত গুৱাহাটী, তিনিচুকীয়া আৰু নতুন দিল্লীৰ কেইবাটাও স্থানত তালাচী চলোৱা হয়। মঙলবাৰে নিশা আৰম্ভ হোৱা অভিযান গোটেই ৰাতি অব্যাহত থাকে।
এই তদন্ত গুৱাহাটীৰ ক্ৰাইম ব্ৰাঞ্চৰ দীপেশ বাজোৰিয়া, ৰ’নক বাজোৰিয়া, ৰাজেশ জৈন আৰু আন কেইবাজনৰ বিৰুদ্ধে দাখিল হোৱা FIR-ৰ ভিত্তিত আৰম্ভ হৈছিল। তেওঁলোকৰ বিৰুদ্ধে ভাৰতীয় দণ্ডবিধি (IPC) আৰু অসম গেম আৰু বেটিং আইনৰ বিভিন্ন ধাৰাত গোচৰ ৰুজু কৰা হৈছিল। পিছত তিনিচুকীয়া আৰক্ষীয়ে দাখিল কৰা একেধৰণৰ বেটিং-সংক্রান্ত দুটা FIR-ও তদন্তত অন্তৰ্ভুক্ত কৰা হয়।
তদন্তকাৰী সংস্থাৰ মতে, অভিযুক্তসকলে IPL খেলক কেন্দ্ৰ কৰি সুসংগঠিত আৰু প্ৰযুক্তিনিৰ্ভৰ বেটিং নেটৱৰ্ক চলাইছিল। মোবাইল ফোন, এনক্ৰিপ্টেড মেছেজিং প্লেটফৰ্ম আৰু বিদেশী বেটিং এপৰ জৰিয়তে এই বেটিং চলোৱা হৈছিল বুলি অভিযোগ।
তদন্তত এইটোও প্ৰকাশ পাইছে যে নগদ ধন আৰু ডিজিটেল লেনদেনৰ জৰিয়তে সংগৃহীত টকা আত্মীয়-স্বজন আৰু সহযোগীৰ জৰিয়তে বিভিন্ন ঠাইলৈ স্থানান্তৰ কৰা হৈছিল।
অভিযান চলাকালীন সময়ত অভিযুক্তসকলৰ বাসগৃহ আৰু গুৱাহাটীৰ এখন ব্যৱসায়িক প্ৰতিষ্ঠানত তালাচী চলোৱা হয়।
ED-য়ে অভিযানত বেটিংৰ ৰেকৰ্ড, গোপন বাৰ্তা আৰু আৰ্থিক লেনদেনৰ তথ্য থকা বিভিন্ন ডিজিটেল ডিভাইচ আৰু ইলেক্ট্ৰনিক সামগ্ৰী জব্দ কৰে। লগতে ১৩ লাখ টকাৰ অঘোষিত নগদ ধনো উদ্ধাৰ কৰা হয়।
ইয়াৰ উপৰিও Mercedes-Benz, MG Hector আৰু Toyota Fortuner গাড়ী তিনিখন জব্দ কৰা হয়। এই বাহনসমূহ অবৈধ উপাৰ্জনৰ ধনেৰে ক্ৰয় কৰা হৈছিল বুলি সন্দেহ কৰা হৈছে। বেটিংৰ ধন স্থানান্তৰত ব্যৱহৃত বুলি সন্দেহ কৰা কেইবাটাও বেংক একাউণ্টো ফ্ৰীজ কৰা হৈছে।
অধিকাৰীয়ে জনোৱা মতে, ঘটনাটোৰ অধিক তদন্ত অব্যাহত আছে।
অধিক পঢ়ক - ঢেকিয়াজুলি চাহৰ ৮০০ টকা প্ৰতি কেজি মূল্যৰে অভিলেখ সৃষ্টি
