নতুন দিল্লী: ভাৰতীয় টকাৰ মূল্য শুক্ৰবাৰে একেৰাহে দ্বিতীয়টো ব্যৱসায়িক অধিৱেশনতো উন্নতি লাভ কৰে। ভাৰতীয় মুদ্ৰাই আমেৰিকান ডলাৰৰ বিপৰীতে ৬৩ পইচা বৃদ্ধি পাই অস্থায়ীভাৱে ৯৫.৭৩ টকাত বন্ধ হয়।
অশোধিত তেলৰ মূল্য হ্ৰাস, দেশীয় শ্বেয়াৰ বজাৰত ইতিবাচক পৰিৱেশ আৰু অত্যাধিক অস্থিৰতা নিয়ন্ত্ৰণ কৰিবলৈ ভাৰতীয় ৰিজাৰ্ভ বেংক (RBI)-ৰ হস্তক্ষেপৰ সম্ভাৱনাই টকাৰ মূল্যক সমৰ্থন আগবঢ়ায়।
আন্তঃবেংক বৈদেশিক মুদ্ৰা বজাৰত টকাই ৯৬.৩০ টকাত লেনদেন আৰম্ভ কৰি দিনটোৰ ভিতৰত শক্তিশালী উন্নতি দেখুৱায়। দিনটোত ই ৯৫.৩০ টকাৰ উচ্চতম আৰু ৯৫.৬৮ টকাৰ নিম্নতম স্তৰ স্পৰ্শ কৰাৰ পিছত ৯৫.৭৩ টকাত স্থিত হয়।
ইয়াৰ পূৰ্বে বৃহস্পতিবাৰেও টকাৰ মূল্য ৫০ পইচা বৃদ্ধি পাই সৰ্বকালৰ নিম্নতম স্তৰৰ পৰা উদ্ধাৰ হৈছিল আৰু ৯৬.৩৬ টকাত বন্ধ হৈছিল।
এজন বিশ্লেষকে কয়, “RBI-ৰ USD/INR buy-sell swap ঘোষণা আৰু কেন্দ্ৰীয় বেংকৰ সক্ৰিয় হস্তক্ষেপৰ লগতে ভূ-ৰাজনৈতিক উত্তেজনা হ্ৰাস পোৱাৰ ফলত আমদানিকৃত সামগ্ৰীৰ মূল্য কমিছে, যাৰ ফলত টকাৰ মূল্য পুনৰ উদ্ধাৰ হৈছে।”
ফৰেক্স বজাৰৰ অংশগ্ৰহণকাৰীসকলে কয় যে আমেৰিকাৰ বৈদেশিক মন্ত্ৰী মাৰ্কো ৰুবিঅ'ৰ মন্তব্যৰ পিছত বিনিয়োগকাৰীৰ আস্থা বৃদ্ধি পাইছে। তেওঁ ইৰান সংকট সন্দৰ্ভত কূটনৈতিক প্ৰচেষ্টা ইতিবাচকভাৱে আগবাঢ়ি যোৱাৰ ইঙ্গিত দিছিল।
এই মন্তব্যই বিশ্বজুৰি শক্তি বজাৰত সম্ভাব্য অস্থিৰতাৰ আশংকা কিছু হ্ৰাস কৰে আৰু ভাৰতীয় টকাকে ধৰি উদীয়মান বজাৰৰ মুদ্ৰাসমূহে স্বস্তি লাভ কৰে।
আমেৰিকাৰ Treasury yield হ্ৰাস পোৱা আৰু ভাৰতীয় শ্বেয়াৰ বজাৰৰ শক্তিশালী প্ৰদৰ্শনৰ ফলতো ভাৰতীয় টকাৰ মূল্য লাভান্বিত হয়।
Benchmark শ্বেয়াৰ সূচকসমূহেও ইতিবাচকভাৱে লেনদেন শেষ কৰে। Sensex ২৩১.৯৯ পইণ্ট বৃদ্ধি পাই ৭৫,৪১৫.৩৫ পইণ্টত বন্ধ হয়, আনহাতে Nifty ৬৪.৬০ পইণ্ট বৃদ্ধি পাই ২৩,৭১৯.৩০ পইণ্টত স্থিত হয়।
তথাপিও বজাৰ বিশ্লেষকসকলে সকীয়াই দিয়ে যে ভূ-ৰাজনৈতিক পৰিস্থিতি এতিয়াও টকাৰ বাবে এক গুৰুত্বপূর্ণ বিপদ হিচাপে আছে।
এজন বিশ্লেষকে কয়, “বৰ্তমানৰ পৰিস্থিতিত টকাৰ স্বল্পম্যাদী ধাৰা ইতিবাচক দিশলৈ ঘূৰি গৈছে। বিশেষকৈ Reserve Bank of India (RBI)-ৰ হস্তক্ষেপে বজাৰৰ অস্থিৰতা নিয়ন্ত্ৰণ আৰু ফৰেক্স বজাৰত আস্থা পুনৰুদ্ধাৰত মুখ্য ভূমিকা পালন কৰি আছে।”
আন এজন বিশ্লেষকে কয় যে অদূৰ ভবিষ্যতে ভাৰতীয় টকাৰ মূল্য ৯৫.০০ৰ পৰা ৯৫.৯০ টকাৰ ভিতৰত উঠা-নমা কৰাৰ সম্ভাৱনা আছে। (IANS)
অধিক পঢ়ক - বজ্ৰপাত পৰি কিশোৰ শ্রমিকৰ মৃত্যু
