গুৱাহাটী: অসমৰ ৰাজ্যপাল লক্ষ্মণ প্ৰসাদ আচাৰ্যই ঘোষণা কৰে যে ৰাজ্য চৰকাৰে উগ্ৰবাদী প্ৰভাৱৰ পৰা সংবেদনশীল যুৱসমাজক সুৰক্ষা দিবলৈ আৰু সাংবিধানিক মূল্যবোধ, সামাজিক সম্প্ৰীতি আৰু জাতীয় ঐক্য শক্তিশালী কৰিবলৈ ৰাজ্যত এখন কাউণ্টাৰ-ৰেডিকেলাইজেচন চেল (Counter-Radicalisation Cell) গঠন কৰিব।
আজিৰ ১৬সংখ্যক অসম বিধানসভাৰ প্ৰথম অধিৱেশনত ভাষণ প্ৰদান কৰি ৰাজ্যপালে কয়, “থলুৱা ভূমিত অবৈধ দখল আৰু সামাজিক সম্প্ৰীতি, জনশৃংখলা আৰু আইনসন্মত শাসনৰ ক্ষতি কৰা কাৰ্যকলাপ ৰোধ কৰিবলৈ আইনগত আৰু প্ৰশাসনিক ব্যৱস্থা অধিক শক্তিশালী কৰি যোৱা হ’ব।”
তেওঁ আৰু কয় যে যোৱা কেইবছৰত গ্ৰহণ কৰা কঠোৰ পদক্ষেপসমূহৰ ওপৰত ভিত্তি কৰি আগন্তুক পাঁচ বছৰত থলুৱা অধিকাৰ আৰু জনসংখ্যাগত সুৰক্ষাৰ বাবে আইনগত আৰু প্ৰশাসনিক ব্যৱস্থা অধিক মজবুত কৰা হ’ব।
ৰাজ্যপালে লগতে জনায় যে, “জাতীয় সুৰক্ষাৰ দীৰ্ঘদিনীয়া সমস্যাৰ মোকাবিলাৰ বাবে এতিয়া এক শক্তিশালী আৰু সমন্বিত কৌশল গ্ৰহণ কৰা হ’ব। শিলিগুড়ি কৰিডৰকে ধৰি কৌশলগতভাৱে গুৰুত্বপূর্ণ অঞ্চলসমূহত সীমান্ত বেৰা নিৰ্মাণ সম্পূৰ্ণ হ’লে সীমান্ত ব্যৱস্থাপনা অধিক শক্তিশালী হ’ব আৰু অনুপ্ৰৱেশ অধিক ফলপ্ৰসূভাৱে নিয়ন্ত্ৰণ কৰিব পৰা যাব।”
তেওঁ কয় যে এই পদক্ষেপসমূহ সময়মতে কাৰ্যকৰী কৰাৰ বাবে অসম চৰকাৰে কেন্দ্ৰ চৰকাৰ আৰু পশ্চিমবংগ চৰকাৰৰ সৈতে ঘনিষ্ঠভাৱে কাম কৰি আছে।
উন্নয়নৰ ক্ষেত্ৰত অসমৰ ৰাজ্যপাল লক্ষ্মণ প্ৰসাদ আচাৰ্যই কয়, “অসম আজি নিজৰ ইতিহাসৰ এক গুৰুত্বপূর্ণ সন্ধিক্ষণত উপনীত হৈছে। যোৱা কেইবছৰত অবকাঠামো, অৰ্থনীতি, স্বাস্থ্য, শিক্ষা, প্ৰযুক্তি, কৃষি আৰু শাসন ব্যৱস্থাত গঢ়ি উঠা শক্তিশালী ভেঁটিয়ে ৰাজ্যবাসীৰ মাজত নতুন আত্মবিশ্বাস আৰু আশা সৃষ্টি কৰিছে।”
তেওঁ কয় যে আগন্তুক পাঁচ বছৰত অন্তৰ্ভুক্তিমূলক উন্নয়ন, সামাজিক সম্প্ৰীতি, পৰিবেশ সংৰক্ষণ আৰু সমাজৰ সকলো শ্ৰেণীৰ বাবে সুযোগ নিশ্চিত কৰি এই অগ্ৰগতিক স্থায়ী ৰূপ দিয়া হ’ব।
আইন-শৃংখলাৰ বিষয়ে ৰাজ্যপালে কয়, “বিধানসভা নিৰ্বাচনত লাভ কৰা জনাদেশে যোৱা দহ বছৰত অনুসৰণ কৰা শান্তি, অৰ্থনৈতিক স্থিৰতা আৰু অন্তৰ্ভুক্তিমূলক উন্নয়নৰ ওপৰত জনসাধাৰণৰ সমৰ্থন প্ৰতিফলিত কৰিছে। শান্তি পুনঃস্থাপনৰ ক্ষেত্ৰত লাভ কৰা সফলতা ঐতিহাসিক।”
তেওঁ লগতে শান্তি প্ৰক্ৰিয়াৰ বাহিৰত থকা একমাত্ৰ মুখ্য সংগঠন ইউনাইটেড লিবাৰেচন ফ্ৰণ্ট অৱ অসমক মূলসুঁতিলৈ আহি অসমৰ উন্নয়ন আৰু বিকাশত অংশগ্ৰহণ কৰাৰ আহ্বান জনায়।
ৰাজ্যপালে মুখ্যমন্ত্ৰী হিমন্ত বিশ্ব শৰ্মাক দ্বিতীয়বাৰৰ বাবে মুখ্যমন্ত্ৰীৰ দায়িত্ব গ্ৰহণ কৰাৰ বাবে অভিনন্দন জনাই কয়, “অসমক অধিক উন্নতি আৰু সমৃদ্ধিৰ দিশে আগবঢ়াই নিয়াৰ বাবে মই তেওঁলৈ শুভেচ্ছা জ্ঞাপন কৰিছোঁ।”
অধিক পঢ়ক - “প্ৰতিজন অনুপ্ৰৱেশকাৰীক এজন এজনকৈ চিনাক্ত কৰি দেশৰ পৰা বহিষ্কাৰ কৰা হ’ব,” অমিত শ্বাহ
