প্ৰধানমন্ত্ৰী মোদীৰ মেল’নীক দিয়া উপহাৰত স্থান পালে অসম আৰু মণিপুৰৰ ৰেচম শিল্প

নতুন দিল্লী: প্ৰধানমন্ত্ৰী নৰেন্দ্ৰ মোডীয়ে ইটালীৰ প্ৰধানমন্ত্ৰী জৰ্জিয়া মেলোনিক শিৰুই আৰু মুগা ৰেচমৰ ষ্ট’লৰ লগতে পণ্ডিত ভীমসেন যোশী আৰু এম এছ সুব্বুলক্ষ্মীৰ CD সংবলিত এটা মাৰ্বল ইনলে বক্স উপহাৰ হিচাপে প্ৰদান কৰে।

শিৰুই লিলি ৰেচমৰ ষ্ট’লখন মণিপুৰৰ শিৰুই কাশং শৃঙ্গৰ কুঁৱলীয়াভৰা পাহাৰৰ পৰা অনুপ্ৰাণিত। এই ডিজাইন বিশ্বৰ আন কোনো ঠাইত নোপোৱা দুৰ্লভ শিৰুই লিলি ফুলৰ পৰা প্ৰেৰণা লৈ তৈয়াৰ কৰা হৈছে। এই ফুলটো ঘণ্টাৰ আকৃতিৰ আৰু হালধীয়া-গোলাপী বগা পাপৰি বিশিষ্ট।

মণিপুৰৰ টাংখুল নাগা সম্প্ৰদায়ৰ বাবে শিৰুই লিলি পবিত্ৰতা, পৰিচয় আৰু সাংস্কৃতিক গৌৰৱৰ প্ৰতীক। সেয়েহে এই ষ্ট’লখনত কেৱল হিমালয়ৰ হস্তশিল্পৰ সৌন্দৰ্যই নহয়, থলুৱা পৰম্পৰা আৰু লোককথাৰ আত্মাও প্ৰতিফলিত হৈছে।

ইটালীতো লিলি ফুলে বহুদিনৰ পৰাই পবিত্ৰতা, সৌন্দৰ্য আৰু শিল্পকলাৰ সূক্ষ্মতাৰ প্ৰতীক হিচাপে স্থান লাভ কৰি আহিছে আৰু ৰেনেছাঁ যুগৰ বহু শিল্পকলাত ইয়াৰ উপস্থিতি দেখা যায়। এই একে প্ৰতীকমূলক অৰ্থই ভাৰত আৰু ইটালীৰ মাজত এক বিশেষ সাংস্কৃতিক সংযোগ গঢ়ি তুলিছে।

প্ৰধানমন্ত্ৰী মোদীয়ে লগতে পণ্ডিত ভীমসেন যোশী আৰু এম এছ সুব্বুলক্ষ্মীৰ CD সহ এটা মাৰ্বল ইনলে বক্সো উপহাৰ দিয়ে।

এই বক্সটো ভাৰতৰ সূক্ষ্ম হস্তশিল্পকলাৰ এক উৎকৃষ্ট নিদৰ্শন, যি আগ্ৰাৰ দক্ষ শিল্পীসকলৰ সৈতে জড়িত। এইটো Pacchikari বা Pietra Dura শিল্পকলাৰ জৰিয়তে তৈয়াৰ কৰা হৈছে। এই শিল্পশৈলীৰ উৎপত্তি ইটালীৰ ফ্ল’ৰেন্সত হৈছিল বুলি বিশ্বাস কৰা হয় আৰু পাছত ভাৰতত ৰাজকীয় পৃষ্ঠপোষকতাত ই বিশেষভাৱে বিকাশ লাভ কৰে। ইয়াৰ ফলত এই শিল্পশৈলী ভাৰত আৰু ইটালীৰ মাজৰ এক উল্লেখযোগ্য সাংস্কৃতিক আৰু শিল্পকলাগত সেতু হিচাপে পৰিগণিত হৈছে।

বগা মাৰ্বেলেৰে তৈয়াৰ কৰা এই বক্সটো লাপিছ লাজুলি, টাৰ্কইজ, মালাকাইট, ক’ৰেল আৰু মাদাৰ-অৱ-পাৰ্ল আদি অৰ্ধ-মূল্যবান পাথৰেৰে সূক্ষ্ম ইনলে শিল্পকলাৰে সজোৱা হৈছে। এই পাথৰসমূহ যত্নসহকাৰে কাটি মাৰ্বেলৰ ওপৰত সংস্থাপন কৰি সুন্দৰ ফুল আৰু জ্যামিতিক আৰ্হি সৃষ্টি কৰা হৈছে, যিয়ে অসাধাৰণ নিখুঁততা আৰু চিৰন্তন সৌন্দৰ্য প্ৰতিফলিত কৰে।

বক্সটোৰ ভিতৰত ভাৰতীয় শাস্ত্রীয় সংগীতৰ দুজন কিংবদন্তি শিল্পী — পণ্ডিত ভীমসেন যোশী আৰু এম এছ সুবুলক্ষ্মীৰ সংগীত সংকলন সংৰক্ষিত আছে।

পণ্ডিত ভীমসেন যোশী, কিংবদন্তি হিন্দুস্তানী কণ্ঠশিল্পী আৰু ভাৰত ৰত্ন বঁটা প্ৰাপক, তেওঁৰ শক্তিশালী আৰু গভীৰ আবেগময় সংগীত পৰিবেশনৰ বাবে বিশ্বজুৰি সুপৰিচিত আছিল।

আনহাতে এম এছ সুবুলক্ষ্মী, বিখ্যাত কৰ্ণাটকী কণ্ঠশিল্পী আৰু ভাৰত ৰত্ন লাভ কৰা প্ৰথম সংগীতশিল্পী, নিজৰ আধ্যাত্মিক অনুভূতিসম্পন্ন সংগীতৰ জৰিয়তে বিশ্বজুৰি ভাৰতীয় সংস্কৃতিৰ দূত হিচাপে পৰিচিত হৈছিল। ৰাষ্ট্ৰসংঘত তেওঁৰ ঐতিহাসিক সংগীত পৰিবেশন বিশেষভাৱে স্মৰণীয়।

এই মাৰ্বল ইনলে বক্স আৰু সংগীত সংকলনসমূহে একেলগে ভাৰত আৰু ইটালীৰ শিল্প, ঐতিহ্য আৰু সাংস্কৃতিক উৎকৰ্ষতাৰ প্ৰতি থকা সন্মান আৰু ভালপোৱা উদযাপন কৰে।

প্ৰধানমন্ত্ৰী নৰেন্দ্ৰ মোডীয়ে ইটালীৰ প্ৰধানমন্ত্ৰী জৰ্জিয়া মেলোনিক এখন মুগা ৰেচমৰ ষ্ট’লো উপহাৰ হিচাপে প্ৰদান কৰে।

মুগা ৰেচম, যাক অসমৰ “সোণালী ৰেচম” বুলি জনা যায়, উত্তৰ-পূৰ্বাঞ্চলৰ ব্ৰহ্মপুত্ৰ উপত্যকাৰ এক দুৰ্লভ আৰু মৰ্যাদাপূৰ্ণ বস্ত্ৰ। ইয়াৰ স্বাভাৱিক সোণালী ৰং আৰু সৰল সৌন্দৰ্যৰ বাবে এই ৰেচম বিশেষভাৱে জনপ্ৰিয়।

কোনো কৃত্ৰিম ৰং ব্যৱহাৰ নকৰাকৈ উৎপাদিত এই ৰেচমে পৰিৱেশ-বান্ধৱ আৰু টেকসই পৰম্পৰাক প্ৰতিফলিত কৰে। বিশ্বৰ অন্যতম শক্তিশালী প্ৰাকৃতিক আঁহ হিচাপে মুগা ৰেচম ইয়াৰ দীঘলীয়া স্থায়িত্ব আৰু মজবুত গুণৰ বাবে অতি মূল্যৱান, যি বহু প্ৰজন্মলৈ টিকি থাকে।

সময়ৰ সৈতে ইয়াৰ স্বাভাৱিক উজ্বলতা আৰু অধিক বৃদ্ধি পায়। লগতে ইয়াৰ আর্দ্ৰতা শোষণ আৰু UV ৰশ্মি প্ৰতিৰোধী গুণে ইয়াক অধিক আৰামদায়ক আৰু বহুমুখী কৰি তোলে।

ইটালীৰ বিলাসবহুল বস্ত্ৰ আৰু চিৰন্তন ডিজাইনৰ সমৃদ্ধ পৰম্পৰাৰ সৈতে অসমৰ “সোণালী ৰেচম”ৰ সৌন্দৰ্যৰ এক স্বাভাৱিক মিল দেখা যায়।

ইয়াৰ পূৰ্বে প্ৰধানমন্ত্ৰী নৰেন্দ্ৰ মোডীয়ে আৰু ইটালীৰ প্ৰধানমন্ত্ৰী জৰ্জিয়া মেলোনিৰ মাজত এক হালকা আৰু আনন্দময় মুহূৰ্ত সৃষ্টি হৈছিল, য’ত প্ৰধানমন্ত্ৰী মোদীয়ে মেল’নীক ‘Melody’ টফী উপহাৰ হিচাপে দিছিল।

মঙলবাৰে ৰোমত উপস্থিত হোৱাৰ পিছত, নিজৰ পাঁচখন দেশ ভ্ৰমণৰ অন্তিম পৰ্যায়ত, প্ৰধানমন্ত্ৰী মোদীয়ে নৈশভোজত মেল’নীৰ সৈতে সাক্ষাৎ কৰে।

তাৰ পিছত দুয়ো নেতাই ঐতিহাসিক কলোছিয়াম ভ্ৰমণ কৰে, য’ত তেওঁলোকে বিভিন্ন বিষয়ত গভীৰ আলোচনা কৰে।

X-ত কৰা এটা পোষ্টত প্ৰধানমন্ত্ৰী মোদীয়ে মেল’নীৰ সৈতে হোৱা সাক্ষাতৰ কিছু মুহূৰ্ত শ্বেয়াৰ কৰি কয়, “ৰোমত উপস্থিত হোৱাৰ পিছত প্ৰধানমন্ত্ৰী মেল’নীৰ সৈতে নৈশভোজত মিলিত হোৱাৰ সুযোগ পাইছিলোঁ। তাৰ পিছত আমি ঐতিহাসিক কলোছিয়াম ভ্ৰমণ কৰোঁ। আমি বহু বিষয়ত মত বিনিময় কৰিলোঁ। আজি হ’বলগীয়া আলোচনাৰ বাবে অপেক্ষা কৰি আছোঁ, য’ত ভাৰত-ইটালী বন্ধুত্ব অধিক শক্তিশালী কৰাৰ বিষয়ে আলোচনা অব্যাহত ৰাখিম।”

বুধবাৰে ভাৰত আৰু ইটালীয়ে দ্বিপাক্ষিক সম্পৰ্কক “Special Strategic Partnership”লৈ উন্নীত কৰে। প্ৰধানমন্ত্ৰী মোদীয়ে কয় যে Joint Strategic Action Plan 2025-2029 এ দুয়ো দেশৰ সম্পৰ্কক অধিক ব্যৱহাৰিক আৰু ভৱিষ্যতমুখী ৰূপ প্ৰদান কৰিছে।

প্ৰধানমন্ত্ৰী নৰেন্দ্ৰ মোডীয়ে প্ৰধানমন্ত্ৰী মেল’নীৰ সৈতে যৌথ সংবাদ বিবৃতিত নিজৰ বক্তব্যত কয় যে দুয়োগৰাকী নেতাৰ মাজত বাঢ়ি অহা সাক্ষাৎ আৰু যোগাযোগে ভাৰত-ইটালীৰ মাজৰ গভীৰ সহযোগিতা আৰু পাৰস্পৰিক বিশ্বাসক প্ৰতিফলিত কৰে। (ANI)

অধিক পঢ়ক - অসম চৰকাৰে ২৫ কোটিৰ পৰা ১০০ কোটি টকাৰ SOPD প্ৰকল্পৰ বাবে বিশেষ সমিতি গঠন কৰিলে