ৰাজ্যিক বাতৰি

অসম চলচ্চিত্ৰ বিত্ত নিগমৰ অধ্যক্ষ যতীন বৰাৰ সংবাদ মেল

অসম

 

অসম চলচিত্ৰ বিত্ত নিগমৰ অধ্যক্ষ যতীন বৰাই সোমবাৰে এখন সংবাদমেল আয়োজন কৰে৷ অসম ৰাজ্যিক চলচ্চিত্ৰ আৰু বিত্ত নিগমত হোৱা সংবাদ মেলখনত অসমৰ চুটি ছবি,এনিমেছনত ৰাজ্য চৰকাৰৰ অনুমোদন সন্দৰ্ভত আলোচনা হয়। ইফালে ছবি কাৰণে ৰাজ্য চৰকাৰে ইতিমধ্যে ১ কোটি টকা মোকলাই দিছে ৷ চুটি ছবিৰ কাৰণে ৫ লাখৰ পৰা ২৫ লাখ টকাৰ ৰাজ সাহাৰ্য্য প্ৰদান কৰে চৰকাৰে ৷আৰু দৈৰ্ঘ্য ছবিৰ ওপৰত প্ৰায় ২৫ লাখ টকাৰ ৰাজ সাহাৰ্য্য দিয়ে চৰকাৰে ৷

লগতে, বন্ধ হৈ থকা ছবিগৃহসমূহ পুনৰ নিৰ্মাণৰ বাবে চৰকাৰে পুঁজি মুকলি কৰি দিয়ে ৷ অন্যহাতে এই সংবাদমেলখনত অসমৰ প্ৰসিদ্ধ নিৰ্মাতা ৰীমা দাসেও অংশ গ্ৰহণ কৰে ৷উল্লেখ্য যে ভিলেইজ ৰকষ্টাৰ,বুলবুল কেন চিঙৰ দৰে ছবিৰ নিৰ্মাতা ৰীমা দাসলৈ ৫০ লাখ টকা আগবঢ়োৱা হয় ৷ ইফালে ৰীমা দাসে নতুন ছবি পূৰ্ণ চন্দ্ৰা নিৰ্মাণ কৰাৰ কথাও ঘোষণা কৰে এই সংবাদমেলখনত ৷

চলিত বৰ্ষৰ আগষ্ট মাহৰ পৰা হ’ব ৰীমা দাসৰ পূৰ্ণ চন্দ্ৰাৰ দৃশ্য গ্ৰহণৰ কাম ৷ ৰীমা দাসৰ নতুন ছবি বুলবুল কেন সিং অসমৰ চিত্ৰগৃহলৈ আহিব আগষ্ট বা ছেপ্টেম্বৰ মাহত ৷ নতুন ছবি নিৰ্মাণৰ কাৰণে ৰীমা দাসলৈ আগবঢ়োৱা ৫০ লাখ টকা ব্যয় নহলে, ৰীমা দাসে বাকী ধন ঘূৰাই দিয়াৰ কথা উল্লেখ কৰে চলচ্চিত্ৰ বিত্ত নিগমলৈ ৷

উল্লেখযোগ্য যে ইয়াৰ পূৰ্বে জাহ্নু বৰুৱালৈ আগবঢ়োৱা হৈছিল ৫০ লাখ টকা ৷অসমৰ শিল্পী কল্যান ন্যাসৰ তৰফৰ পৰা কেইবাজনো শিল্পীলৈ ৫০ লাখ টকা আগবঢ়োৱা হৈছে ৷ ইফালে অসমীয়া ছবিজগতৰ লগতে ভ্ৰাম্যমানৰ অভিনেত্ৰী প্ৰাঞ্জনা দত্ত আৰু বৰদৈচিলা থিয়েটাৰৰ সন্দৰ্ভত অভিনেতা যতীন বৰাই কয় যে প্ৰাঞ্জনা দত্ত আৰু বৰদলৈছিলা থিয়েটাৰৰ মাজত হোৱা ঘটনা অত্যন্ত দুৰ্ভাগ্যজনক ৷

লগতে তেওঁলোকে আলোচনা মাজেৰে সমস্যাটো সমাধান কৰিব পাৰিলে হয় ৷ ভ্ৰাম্যমানৰ লগত বহু কলাকুশলী জড়িত হৈ আছে ৷এনেধৰণৰ ঘটনাসমূহে দৰ্শকক মোহভংগ কৰিব ৷ অসমীয়া ছবিৰ দুৰ্দিনত চৰকাৰ,কলা কুশলী সকলোৱে ছবিসমূহ জীয়াই থাকিবৰ কাৰণে পাৰ্যমানে চেষ্টা কৰি আছে ৷ গতিকে ভ্ৰাম্যমাণ থিয়েটাৰক আমি জীয়াই ৰাখিব লাগিব ৷

ইফালে নাট্যকাৰ অভিজিৎ ভট্টাচাৰ্যৰ সন্দৰ্ভত উত্থাপিত অভিযোগ সন্দৰ্ভত অভিনেতা যতীন বৰাই কয় যে মোৰ ক্ষেত্ৰত এনে হোৱা নাই যেতিয়া এই সন্দৰ্ভত মই মতামত দিব নিবিচাৰো ৷কিন্তু সকলো কথা আলোচনাৰ মাজেৰে সমাধান কৰিলে ভাল বুলি মন্তব্য কৰে যতীন বৰাই ।

 

অন্য খবৰৰ বাবে পঢ়ক: গুৱাহাটীৰ প্ৰেছ ক্লাবত অভিনেত্ৰী প্ৰাঞ্জনা দত্তৰ সংবাদমেল