২১এপ্ৰিলৰ পাছত ৰাজ্যত পুনৰ আৰম্ভ হ’ব মথাউৰি নিৰ্মাণৰ কাম

অসমত অহা ২১এপ্ৰিলৰ পাছত পুনৰ আৰম্ভ হ’ব মথাউৰি নিৰ্মাণৰ কাম ৷ ক’ৰ’না মহামাৰী প্ৰতিৰোধৰ উদ্দেশ্য ঘোষণা কৰা তলাবন্ধৰ পৰিপ্ৰেক্ষিতত মথাউৰি নিৰ্মাণৰ কাম স্থগিত ৰখা হৈছিল ৷ মথাউৰি নিৰ্মাণৰ কাম পুনৰ আৰম্ভ কৰাৰ উদ্দেশ্য জলসম্পদ মন্ত্ৰী কেশৱ মহন্তই ৰাজ্যৰ বিভিন্ন স্থান পৰিদৰ্শন কৰি মথাউৰিসমূহৰ অৱস্থা বুজ লৈছে ৷ মন্ত্ৰীজনে ইতিমধ্যে কামৰূপ, বিশ্বনাথ আদি জিলাৰ বহু মথাউৰিৰ অৱস্থা লৈছে ৷ বিভাগীয় সূত্ৰই প্ৰকাশ কৰা অনুসৰি বহু স্থানত কেতবোৰ অৱস্থা সন্তোষজনক নহয় ৷ বাৰিষা নৈৰ বাঢ়নী পানীয়ে এনে মথাউৰি ভাঙি পেলোৱাৰ আশংকা আছে ৷ ইয়াৰ পৰিপ্ৰেক্ষিতত বাৰিষাৰ পূৰ্বে সংকটাপন্ন মথাউৰিৰ মেৰামতি তথা পুনৰ নিৰ্মাণৰ আঁচনি গ্ৰহণ কৰিছে জলসম্পদ বিভাগে ৷ সেই অনুসৰি অহা ২১এপ্ৰিলৰ পাছত বিভাগে মথাউৰি নিৰ্মাণৰ কা’ম আৰম্ভ কৰিব ৷ কাম কৰাৰ সময়ত সংশ্লিষ্ট শ্ৰমিক-কৰ্মচাৰীয়ে ক’ৰ’না মহামাৰী প্ৰতিৰোধৰ বাবে কেন্দ্ৰই জাৰি কৰা নীতি-নিৰ্দেশনা মানি চলিব ৷ অৱশ্যে মৰিগাঁও জিলাৰ লাহৰীঘাটত ক’ৱিড-19আক্ৰান্ত চিনাক্ত হোৱাত জলসম্পদ বিভাগে কিছু বিব্ৰত বোধ কৰিছে ৷ উল্লেখ্য যে ৰাজ্যত প্ৰতিবাৰে অক্টোবৰৰ পৰা এপ্ৰিলৰ ভিতৰত মথাউৰি নিৰ্মাণ কৰিব লাগে ৷ এইবাৰ ক’ৰ’না মহামাৰীয়ে মথাউৰি নিৰ্মাণত ব্যাঘাত জন্মালে ৷

অন্য খবৰৰ বাবে পঢ়ক: ২১ এপ্ৰিলৰ পৰা কাৰ্যালয় পুনৰ মুকলিঃ দিছপুৰে কেনেদৰে সুনিশ্চিত কৰিব কৰ্মচাৰীৰ উপস্থিতি

ভিডিঅ প্ৰতক্ষ্য কৰক: SEBA will declare Results of HSLC-High Madrasa within 30 days from repeal of lockdown