সাৱধান হওকঃ কেৰালাত প্ৰথমজন ক’ৰ’না ভাইৰাছ আক্ৰান্তৰ মৃত্যু
প্ৰায় সমগ্ৰ বিশ্বজুৰি ত্ৰাসৰ সৃষ্টি কৰা ক’ৰ’না মহামাৰীত কেৰালাতো এজন লোকে প্ৰাণ হেৰুৱালে ৷ ৰাজ্যখনৰ কোচিৰ এই লোকজনে অলপতে ডুবাই ভ্ৰমণ কৰিছিল ৷ ঘৰলৈ ঘূৰি অহাৰ পাছত অসুস্থ হৈ পৰা লোকজনক যোৱা ২২মাৰ্চত কালামাছাৰী চিকিৎসা মহাবিদ্যালয় হাস্পতালত ভৰ্তি কৰা হয় ৷ তাত চিকিৎসাধীন হৈ থকা অৱস্থাত তেওঁৰ মৃত্যু হয় ৷ মৃত্যুৰ সময়ত তেওঁৰ বয়স হৈছিল ৬৯ বছৰ ৷ এই লোকজনেই হৈছে ক’ৰ’না মহামাৰীত মৃত্যু হোৱা কেৰালাৰ প্ৰথমজন লোক ৷ কেৰালাত এই মহাৰীত বহুসংখ্যক লোক আক্ৰান্ত হৈছে ৷ ইয়াৰে একাংশ সুস্থ হৈছে ৷ ৰাজ্যখনৰ প্ৰথমগৰাকী ক’ৰ’না আক্ৰান্ত হৈছে এগৰাকী যুৱতী ৷ ২৪বছৰীয়া এই যুৱতীগৰাকীৰ অৱস্থা সম্প্ৰতি সুস্থ ৷ তেওঁ চীনৰ য়ুহানত শিক্ষাগ্ৰহণ কৰি আছিল ৷ আনহাতে, দেশা উদ্বেগজনকভাবে বৃদ্ধি পাইছে ক’ৰ’না মহামাৰীত আক্ৰান্তৰ সংখ্যা ৷ যোৱা মাথোঁ ২৪ঘণ্টাতে দেশৰ বিভিন্ন স্থানত নতুনকৈ ধৰা পৰিল ১৪৯জন আক্ৰান্ত ৷ ইয়াৰ লগে লগে এই মহামাৰীত আক্ৰান্তৰ সংখ্যা আঠ শতাধিক হৈছে ৷ আনহাতে, মাথোঁ ২৪ঘণ্টাত দেশত ১৪৯জন আক্ৰান্ত ধৰা পৰিছে ৷ কেন্দ্ৰীয় স্বাস্থ্য মন্ত্ৰালয়ে শনিবাৰে প্ৰকাশ কৰা তথ্য অনুসৰি ভাৰতত ক’ৰ’না ভাইৰাছ আক্ৰান্ত লোকৰ সংখ্যা সম্প্ৰতি ৮৭৩জন ৷ ইয়াৰে ১৯জনৰ ইতিমধ্যে মৃত্যু হৈছে ৷ ইপিনে, বিশ্ব স্বাস্থ্য সংস্থা (হু)ই সম্প্ৰতি এক উদ্বেগজনক বাৰ্তা প্ৰেৰণ কৰিছে ৷
সংস্থাটোৰ মতে, ক’ৰ’না ভাইৰাছৰ প্ৰতিষেধক ওলাবলৈ অন্ততঃ আৰু ১২ৰ পৰা ১৮মাহ সময়ৰ প্ৰয়োজন হ’ব ৷ সেয়েহে সংস্থাটোৱে ক’ৰ’না ভাইৰাছ মহামাৰীৰ বিৰুদ্ধে সন্মিলিতভাবে যুঁজ দিবলৈ বিশ্বৰ সকলো দেশলৈ আহ্বান জনাইছে ৷ উল্লেখ্য যে এই বৰ্তমানলৈ সমগ্ৰ বিশ্বত লক্ষাধিক লোক আক্ৰান্ত হোৱাৰ উপৰি ১৫হেজাৰৰো অধিক প্ৰাণ হেৰুৱাইছে ৷
আনহাতে, ক’ৰ’না ভাইৰাছ সৃষ্ট মহামাৰীয়ে সমগ্ৰ বিশ্বক গভীৰ আৰ্থিক সংকটলৈ ঠেলি দিয়া বুলি আন্তৰ্জাতিক মুদ্ৰা নিধি(আই এম এফ)য়ে প্ৰকাশ কৰিছে ৷ এক বিবৃতিত আই এম এফৰ মুৰব্বী ক্ৰিষ্টিলানা জৰ্জিয়েভাই কয়, “ এই কথা স্পষ্ট হৈ পৰিছে যে আমি আৰ্থিক মন্দাত সোমাই পৰিছোঁ ৷ এই মন্দা ২০০৯ৰ মন্দাতকৈ অধিক গভীৰ ৷” উল্লেখ্য যে যোৱা মঙলবাৰে ক’ৰ’না মহামাৰীৰ প্ৰতিৰোধৰ উদ্দেশ্যে প্ৰধানমন্ত্ৰী নৰেন্দ্ৰ মোডীয়ে এক ২১ দিনীয়া দেশজোৰা তলাবন্ধ ঘোষণা কৰে ৷
অন্য খবৰৰ বাবে পঢ়ক : ক’ৰ’না ৰোগীৰ চিকিৎসাঃ ৩৪ খন ব্যক্তিগত চিকিৎসালয়ৰে অসম চৰকাৰৰ চুক্তি
