বাঘজান তৈল ক্ষেত্ৰৰ অগ্নিকাণ্ডঃ তদন্তৰ নিৰ্দেশ মুখ্যমন্ত্ৰী সোণোৱালৰ
অইল ইণ্ডিয়া লিমিটেডৰ অধীনৰ তিনিচুকীয়া জিলাৰ বাঘজান তৈল ক্ষেত্ৰৰ অগ্নিকাণ্ডৰ ঘটনাৰ তদন্তৰ নিৰ্দেশ জাৰি কৰিছে মুখ্যমন্ত্ৰী সৰ্বানন্দ সোণোৱালে ৷ যোৱা মঙলবাৰে সূত্ৰপাত ঘটা এই অগ্নিকাণ্ডৰ তদন্তৰ দায়িত্ব প্ৰদান কৰা হৈছে অতিৰিক্ত মুখ্য সচিব মনিন্দৰ সিঙক ৷ তদন্তৰ প্ৰতিবেদন ১৫দিনৰ ভিতৰত দাখিল কৰিবলৈ মুখ্যমন্ত্ৰীয়ে নিৰ্দেশ জাৰি কৰিছে ৷ উল্লেখ্য যে বাঘজান তৈল ক্ষেত্ৰৰ পাঁচ নম্বৰ খাদত সূত্ৰপাত ঘটা এই অগ্নিকাণ্ডই ইমানেই ভয়াবহ ৰূপ লয় যে ওচৰ-পাঁজৰৰ কমেও ৭হেজাৰ লোকক স্থানান্তৰিত কৰিব লগীয়া হয় ৷ এইসকল লোকৰ বাবে ১২টা সাহায্য শিবিৰ স্থাপন কৰা হৈছে ৷ তদুপৰি অগ্নিকাণ্ড নিৰ্বাপনত নিয়োজিত অইলৰ দুজন নিৰ্বাপক বাহিনীয়ে প্ৰাণ হেৰুৱাবলগীয়া হৈছে ৷ আনহাতে, তিনিদিন অতিক্ৰম কৰাৰ পাছতো জুই নুমুৱাবলৈ সক্ষম নোহোৱাত বহুতৰে মনত ক্ষোভৰ সৃষ্টি হৈছে ৷ মুখ্যমন্ত্ৰীৰ নিৰ্দেশত কালি উদ্যোগ মন্ত্ৰী চন্দ্ৰমোহন পাটোৱাৰীয়ে ঘটনাস্থলীত উপস্থিত হৈ পৰিস্থিতিৰ বুজ লয় ৷ তদুপৰি তেওঁ অইলৰ বিষয়াবৰ্গৰ সৈতে আলোচনাত মিলিত হয় ৷ ক্ষতিগ্ৰস্ত পৰিয়ালসমূহৰ প্ৰতিটোকে ৩০হেজাৰ টকাকৈ এককালীন সাহায্য প্ৰদানৰ কথা ঘোষিত হৈছে ৷
আনহাতে, বুধবাৰে মুখ্যমন্ত্ৰী সোণোৱালে ঘোষণা কৰে যে বাঘজান তৈল ক্ষেত্ৰৰ অগ্নি নিৰ্বাপনত নিয়োজিত অইল ইণ্ডিয়া লিমিটেডৰ দুই দুৰ্ভগীয়া কৰ্মী দুৰ্লভ গগৈ আৰু তিষেশ্বৰ গোহাঁইৰ শেষকৃত্য ৰাজ্যিক মৰ্যদাৰে সম্পন্ন কৰা হ'ব ৷ মঙলবাৰে তৈল ক্ষেত্ৰখনৰ ৫নম্বৰ খাদত অগ্নিকাণ্ডৰ সূত্ৰপাত হোৱাৰ কিছু সময়ৰ পাছতে গগৈ আৰু গোহাঁই সন্ধানহীন হয় ৷ আজি পুৱা এন ডি আৰ এফে দুয়োৰে নিথৰ দেহ তৈল ক্ষেত্ৰখনৰ ওচৰৰ এখন বিলৰ পানীৰ পৰা উদ্ধাৰ কৰে ৷ এই ঘটনাক লৈ ৰাজ্যবাসী শোকত ম্ৰিয়মান হোৱাৰ সময়তে মুখ্যমন্ত্ৰী সোণোৱালে কয় যে দুৰ্ভগীয়াদ্বয়ৰ শেষকৃত্য ৰাজ্যিক মৰ্যদাৰে সম্পন্ন কৰা হ'ব ৷ আনহাতে, প্ৰাৰম্ভিক অনুসন্ধানত পোহৰলৈ অহা তথ্য অনুসৰি অগ্নিকাণ্ডৰ সূত্ৰপাত ঘটাৰ পাছত কালি বিয়লি তিনিজন অগ্নি-নিৰ্বাপক কৰ্মীয়ে ঘটনাস্থলীৰ ওচৰৰ পানীৰে পৰিপূৰ্ণ এখন বিলত জাঁপ দিয়ে ৷ ইয়াৰে দুজন অগ্নি-নিৰ্বাপক কৰ্মী আছিল অইল ইণ্ডিয়া লিমিটেডৰ আৰু আনজন অ' এন জি চিৰ ৷ সৌভাগ্যবশতঃ অ' এন জি চিৰ কৰ্মীজনে প্ৰাণৰক্ষা কৰিবলৈ সক্ষম হয় ৷ কিন্তু অইল ইণ্ডিয়াৰ কৰ্মীদ্বয়ে প্ৰাণৰক্ষা কৰিবলৈ সক্ষম নহ'ল ৷ এই দুৰ্ভগীয়া কৰ্মীদ্বয়েই হৈছে দুৰ্লভ গগৈ আৰু তিষেশ্বৰ গোহাঁই ৷
