অসমত চলিত বৰ্ষৰ বানত এহেজাৰ কোটি টকাৰ শস্য নষ্ট হয়। অসম বিধানসভাৰ অধিৱেশন কালত এই তথ্য প্ৰকাশ কৰে কৃষি মন্ত্ৰী অতুল বৰাই ৷ অগপ বিধায়ক পবিন্দ্ৰ ডেকাৰ এটা প্ৰশ্নৰ উত্তৰ দি কৃষি মন্ত্ৰী বৰাই কয় যে চলিত বৰ্ষৰ এপ্ৰিলৰ পৰা হোৱা বানত ২.৮লাখ হেক্টৰ কৃষিভূমি বুৰ যায় ৷ ফলত এহেজাৰ কোটি টকাৰ শস্য নষ্ট হয়। এই অভাৱনীয় ক্ষয়-ক্ষতিৰ তথ্য দাঙি ধৰাৰ সময়ত মন্ত্ৰী বৰাই আৰু কয় যে অৱশ্যে বানত কৃষি খণ্ডৰ ক্ষয়-ক্ষতিৰ প্ৰকৃত তথ্য দুৰ্যোগ্য ব্যৱস্থাপনাই মূল্যায়ন সম্পূৰ্ণ কৰাৰ পাছতহে জানিব পৰা যাব ৷
আনহাতে, ক্ষতিগ্ৰস্ত কৃষকক সকাহ দিয়াৰ উদ্দেশ্যে তিনিটা আৰ্থিক প্ৰস্তাৱ উত্থাপন কৰা হৈছে বুলি বৰাই সদৰী কৰে ৷ ইয়াৰে এটা প্ৰস্তাৱ ১৩৯.৬৪ কোটি টকাৰ ৷ আন দুটা প্ৰস্তাৱৰ এটা ৪৫.৩৯ কোটি টকাৰ আৰু আনটো ৩৮.৪৩কোটি টকাৰ ৷ অৱশ্যে চৰকাৰে কৃষকসকলক কৃষি ঋণ ৰেহাই দিয়াৰ কোনো সিদ্ধান্ত গ্ৰহণ কৰা নাই ৷
