হোজাইত ঘোচ লওঁতে হাতে-লোটে গ্ৰেপ্তাৰ লাট মণ্ডল
অসম আৰক্ষীৰ দুৰ্নীতি নিবাৰক আৰু তদাৰকী সঞ্চালকালয়ে হোজাই ৰাজহ চক্ৰ কাৰ্যালয়ৰ এজন বিষয়াক ঘোচ লোৱা অৱস্থাত হাতে-লোটে গ্ৰেপ্তাৰ কৰিছে। অভিযুক্ত বিষয়াজনৰ নাম দেৱানন্দ বৰা ৷ বৰাৰ বিৰুদ্ধে দুৰ্নীতি নিবাৰক শাখাই এটা গোচৰ ৰুজু কৰি তদন্ত অব্যাহত ৰাখিছে। এই তথ্য সদৰী কৰি অসম আৰক্ষীৰ বিশেষ সঞ্চালক প্ৰধান জি পি সিঙে এটা টুইটত কয় , " হোজাইৰ ৰাজহ চক্ৰ কাৰ্যালয়ত আজি অসম আৰক্ষীৰ দুৰ্নীতি নিবাৰক সঞ্চালকালয়ে দেৱানন্দ বৰা নামৰ এজন লাট মণ্ডলক ঘোচ লোৱা অৱস্থাত হাতে-লোটে গ্ৰেপ্তাৰ কৰে। ঘটনা সন্দৰ্ভত এটা গোচৰ ৰুজু কৰা হৈছে।"
ইয়াৰ পূৰ্বেও যোৱা কিছুদিনত ৰাজ্যত ঘোচ লোৱা অৱস্থাত হাতে-লোটে গ্ৰেপ্তাৰ হৈছে কেবাজনো চৰকাৰী বিষয়া-কৰ্মচাৰী। এই আৰম্ভণিতে গুৱাহাটীত ২০ হেজাৰ টকা ঘোচ লোৱা অৱস্থাত এজন চৰকাৰী বিষয়া গ্ৰেপ্তাৰ হয়। এই অভিযুক্ত বিষয়াজন হৈছে পশুপালন আৰু পশু চিকিত্সা বিজ্ঞান বিভাগৰ উপ-সঞ্চালক । অভিযুক্তজনে পশ্চিমবংগৰ আলিপুৰদুৱাৰৰ পৰা তিনিজনী গৰুসহ কোকৰাঝাৰস্থিত নিজৰ পামলৈ এখন ট্ৰাক পাৰ হবলৈ দিছিল। এই সম্পৰ্কত কোকৰঝাৰৰ আৰক্ষী অধীক্ষকে অভিযোগ পোৱাৰ পাছতে ঘটনাটো পোহৰলৈ আহে।
