ক'ৰ'নাৰ বিভীষিকাৰ মাজতে ৰাজ্যত লাখ লাখ লোকে বানত হাহাকাৰ কৰিছে। সংহাৰী বানৰ কবলত পৰিছে ৰাজ্যৰ ২৬খনকৈ জিলা । উজনিৰ পৰা নামনিলৈ সকলোতে এতিয়া বানৰ বিভীষিকা। হেজাৰ হেজাৰ লোকে ঘৰ-বাৰী এৰি মথাউৰি বা ওখ স্থানত আশ্ৰয় লৈছে।চৌদিশে মাথোঁ হাহাকাৰ। বানপীড়িত লোকসকলে খাদ্য–বাসস্থানৰ সংকটত ভোগাৰো অভিযোগ উত্থাপিত হৈছে। এনে অৱস্থাতে বলিউদৰ দুই তাৰকা অভিনেতা জন আব্ৰাহাম আৰু বৰুণ ধৱনে বানপীড়িতসকলক সহায়ৰ কৰাৰ বাবে ছচিয়েল মিডিয়াযোগে আহ্বান জনাইছে।
অভিনেতাদ্বয়ে টুইটাৰ আৰু ইনষ্টাগ্ৰামত এই আহ্বান জনাইছে। অভিনেতা জন আব্ৰাহামে টুইটাৰত বানবিধ্বস্ত অসমৰ কেইখনমান ফটো শ্বেয়াৰ কৰি লিখিছে, 'অসমক সহায়ৰ প্ৰয়োজন, খৰধৰ কৰক।' জনে অসম চৰকাৰৰ সাহায্য পুঁজিৰ লিংক শ্বেয়াৰ কৰি সাহায্য আগবঢ়াবলৈ আহ্বান জনাইছে।
আনহাতে, বৰুণ ধৱনেও অসমৰ বানাক্ৰান্তৰ বাবে নিজৰ ইনষ্টা ষ্টৰীত আহ্বান জনাইছে। বৰুণেও অসমৰ বানৰ এখন ফটো শ্বেয়াৰ কৰাৰ লগতে সাহায্য পুঁজিৰ লিংক শ্বেয়াৰ কৰি সকলোকে সাহায্য আগবঢ়াবলৈ আহ্বান জনাইছে।
