অইল ইণ্ডিয়া লিমিটেডৰ তিনিচুকীয়া জিলাৰ বাঘজান তৈল ক্ষেত্ৰত আজি উপস্থিত হয় লেফটেনেণ্ট জেনেৰেল তথা তেজপুৰস্থিত তৃতীয় ক'পৰ্ছৰ জেনেৰেল অফিচাৰ কমাণ্ডিং অসম সন্তান ৰাণা প্ৰতাপ কলিতা। আজি সেনা-বাহিনীৰ শীৰ্ষ বিষয়াবৰ্গৰ সৈতে অগ্নিকাণ্ডস্থলীত উপস্থিত হৈ লেফটেনেণ্ট জেনেৰেল কলিতাই তৈল প্ৰতিষ্ঠানসমূহৰ জ্যেষ্ঠ বিষয়াবৰ্গৰ সৈতে এক আলোচনাত মিলিত হয় ৷ শীৰ্ষ সেনা বিষয়াজনৰ সৈতে আলোচনাত অংশগ্ৰহণ কৰে অইল ইণ্ডিয়া লিমিটেডৰ সঞ্চালক(ই এণ্ড ডি) ডঃ পি চন্দ্ৰশেখৰণসহ প্ৰতিষ্ঠানটোৰ জ্যেষ্ঠ বিষয়াবৰ্গ আৰু অ' এন জি চিৰ জ্যেষ্ঠ বিষয়াসকলে ৷ পৰিস্থিতি সন্দৰ্ভত তেওঁলোকে বিস্তাৰিতভাবে আলোচনা কৰে ।
উল্লেখ্য যে এই তৈল ক্ষেত্ৰৰ ৫ নম্বৰ খাদত যোৱা ৯ জুনত বিধ্বংসী অগ্নিকাণ্ডৰ সূত্ৰপাত ঘটে ৷ এই অগ্নিকাণ্ডত ওচৰ-পাঁজৰৰ সহস্ৰাধিক লোকো ক্ষতিগ্ৰস্ত হয় । ইপিনে, ভাৰতীয় সেনাই এই দুৰ্যোগৰ সময়ত অইল ইণ্ডিয়া লিমিটেডক ৩৫খন তাপ ৰোধক প্ৰদান কৰিছে ৷ ইতিমধ্যে অগ্নিকাণ্ডস্থলীৰ ওচৰত এই তাপ ৰোধক স্থাপনৰ কাম সম্পূৰ্ণ হৈছে ৷ আনহাতে, অঞ্চলটোত পৰিৱেশৰ ওপৰত পৰা বিৰূপ প্ৰভাৱক লৈ বিশেষজ্ঞৰ দলে অধ্যয়ন কৰি আছে ৷
