বি টি এডিৰ ভোটগ্ৰহণ কেন্দ্ৰসমূহৰ বাবে ৰাজ্য চৰকাৰে ১৮কোটি মোকলাই দিছে ৷ এই সংক্ৰান্তীয় অনুমোদন ইতিমধ্যে মুকলি হৈছে ৷ প্ৰাপ্ত তথ্য অনুসৰি এই ধন ভোটকেন্দ্ৰসমূহ ক'ৰ'না ভাইৰাছ প্ৰতিৰোধ ব্যৱস্থা গঢ়ি তোলাৰ কামত ব্যয় কৰা হ'ব ৷ উল্লেখ্য যে যোৱা চাৰি এপ্ৰিলত ৪০আসনযুক্ত বি টি চিৰ নিৰ্বাচন অনুষ্ঠিত হোৱাৰ কথা আছিল। কিন্তু ক'ৰ'না মহামাৰীৰ পৰিপ্ৰেক্ষিতত এই নিৰ্বাচন স্থগিত ৰখা হয় ৷
যোৱা ২০মাৰ্চত ৰাজ্যিক নিৰ্বাচন আয়োগে বি টি চি নিৰ্বাচন স্থগিত ৰখাৰ কথা ঘোষণা কৰে ৷ বি টি এ ডি যোৱা ২০এপ্ৰিলৰ পৰা ৰাজ্যপালৰ শাসনত আছে ৷ আনহাতে, অন্যান্য পিছপৰা শ্ৰেণী আৰু ভৈয়াম জনজাতি কল্যাণ বিভাগৰ সূত্ৰই জনোৱা মতে, যদি ক'ৱিড মহামাৰীজনিত পৰিস্থিতি স্বাভাৱিক হয়, তেন্তে অহা অক্টোবৰ বা নৱেম্বৰত বি টি চি নিৰ্বাচন অনুষ্ঠিত হোৱাৰ সম্ভাৱনা আছে ৷ অৱশ্যে এই ক্ষেত্ৰত চূড়ান্ত সিদ্ধান্ত ৰাজ্যিক নিৰ্বাচন আয়োগেহে গ্ৰহণ কৰিব ৷
ইপিনে, এক সূত্ৰই জনোৱা মতে, এইবাৰ বি টি এ ডিত ভোটগ্ৰহণ কেন্দ্ৰ বৃদ্ধি কৰাৰ সম্ভাৱনা আছে ৷
আৰু পঢ়িব পাৰেঃ নতুন শিক্ষানীতিয়ে ভাৰতক জ্ঞান-কেন্দ্ৰত পৰিণত কৰিবঃ ৰাষ্ট্ৰপতি
